काठमाडौं, २५ कात्तिक । केही महिनाभित्रै नागरिकको ढाँड सेक्ने गरी मूल्यवृद्धि भएको छ । दैनिक उपभोग्य सामाग्री देखि सवारी भाडा, निर्माण सामाग्रीलगायत हरेक क्षेत्रमा मूल्यवृद्धि निसास्सिदो बनेको छ । सर्वसाधारणको चुल्होमा ठाडो असर परेको छ ।
इन्धनमा निरन्तर मूल्यवृद्धि भएको छ । गत वर्ष ९९ रुपैयाँ प्रति लिटरमा झरेको पेट्रोलको मूल्य १३६ पुगेको छ । डिजेल, मट्टीटेल र खाना पकाउने एलपी ग्याँसमा समेत व्यापक मूल्य वृद्धि भएको छ । यसले हरेक क्षेत्रमा असर पारेको छ ।
नेपाल आयल निगमले अन्तर्राष्ट्रिय बजारमा मूल्यवृद्धि भएकाले वाध्यता परेको जनाएको छ । निगम अहिले घाटा खाइरहेको छ । तर, सरकारले इन्धनमा अत्याधिक कर उठाउने देखि जलविद्युत आयोजनाका लागि भन्दै प्रत्येक लिटरमा अतिरिक्त शुल्क कटौती गर्दैै आएको छ । भार जनतामा परेको छ ।
इन्धनको मूल्य वृद्धि हुँदा सवारी साधनको भाडा पनि वृद्धि भएको । अघिल्लो महिना २८ प्रतिशतले भाडा वृद्धि भएको छ । सार्वजनिक यातायातको भाडा वृद्धिले ढुवानीमा समेत असर परेको छ । ढुवानीको भाडा समेत वृद्धि हुँदा उपभोग्य सामाग्रीको मूल्य आकाशिएको छ ।
खाद्यान्नको मूल्य निकै बढेको छ । खाने तेल, घीऊ, चामल, पीठो, दाल, मसला जस्ता सामाग्रीको मूल्य बढेको छ । खाने तेलको मूल्य एक वर्षभित्र झण्डै दोब्बर भएको छ ।
निर्माण सामाग्रीको पनि मूल्यवृद्धि भएको छ । फलामे छड, सिमेन्ट, रोडा, ईट्टा, बालुवा, ढुङ्गा, गिट्टीलगायत सामाग्रीको मूल्य वृद्धि भएको छ । काठ, फलाम, स्टिलको पनि मूल्य वृद्धि भएको छ । फलामे छडको १० देखि १५ रुपैयाँ, सिमेन्टको ५० देखि १०० रुपैयाँले मूल्यवृद्धि भएको छ । पाइपको मूल्य २५ प्रतिशतसम्मले बढेको छ ।
तरकारी र फलफूलको मूल्य पनि चर्किएको छ । अहिले बजारमा आलु सस्तिने मौसममा पनि घटेको छैन । प्याज, लसुन जस्ता देनिक उपभोग्य सामाग्रीहरु ५० प्रतिशतले मूल्य वृद्धि भएको छ । गोलभेडाको मूल्य प्रतिकेजी ६० रुपैयाँभन्दा बढी छ । दशैं र तिहारको बीचमा १०० रुपैयाँ नाघेको थियो । कुनैपनि तरकारी प्रतिकेजी ६० भन्दा कम छैन । प्रायः तरकारीको मूल्य ८० देखि १०० को बीचमा छ ।
बिजुलीको सामानको पनि अत्याधिक मूल्यवृद्धि भएको छ । कतिपयको ५० देखि शतप्रतिशत मूल्यवृद्धि भएको छ । उपभोक्ताहरु महङ्गो मूल्यमा खरिद गर्न वाध्य भएका छन् ।
लत्ताकपडाको पनि व्यापक मूल्यवृद्धि भएको छ । ५० देखि शत प्रतिशत मूल्यवृद्धि भएको छ । जाडोका कपडाको व्यापक मूल्यवृद्धि भएको छ । जुत्ताको पनि मूल्य बढेको छ ।
एक वर्षमा बढी मूल्यवृद्धि भएका सामाग्री
१. खाद्यान्न- २५ देखि शतप्रतिशत
२. निर्माण सामाग्री- २० देखि ५० प्रतिशत
३. इन्धन- १० देखि ३५ प्रतिशत
४. तरकारी- २० देखि ५० प्रतिशत
५. बिजुलीको सामान- २० देखि ५० प्रतिशत
६. सवारी भाडा- २८ प्रतिशत
७. लत्ताकपडा- २० देखि शतप्रतिशत
