प्रमुख प्रतिपक्षी दल नेकपा (एमाले) का स्थायी कमिटी सदस्य तथा गण्डकी प्रदेशका पूर्व मुख्यमन्त्री पृथ्बीसुब्बा गुरुङले आगामी १०औं महाधिवेशनबाट केपी शर्मा ओली नै सर्वसम्मत्को अध्यक्ष बन्ने घोषणा गरेका छन् । उनले नेतृत्वको लागि महाधिवेशनमा सकेसम्म निर्वाचन नहुने यदि भईहाल्यो भने पनि ओली नै विजयी हुने पनि दाबी गरे । आज (आइतबार) विहान नेपाली रेडियो नेटवर्कबाट प्रसारण भएको ‘नेपाली बहस’ कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् । उनले पार्टीको महाधिवेशनमा माधव नेपाल नेतृत्वको नेकपा (एकीकृत समाजवादी) पार्टीलाई नबोलाईने पनि स्पष्ट पारे । उनले भनेका छन्–‘होइन, त्यो त हाम्रो कुरा हो नि । हाम्रो महाधिवेशनमा कसलाई बोलाउने अनि कसलाई नबोलाउने भन्ने त हाम्रो कुरा हो नि । यसमा हामीलाई कसैले निर्देशित गर्ने होइन् । हामी यो मुलुकको सबै राजनीतिक दलहरुलाई पठाउँछौं । तर, त्यो पार्टीलाई बोलाउने अथवा नबोलाउने भन्ने कुरा हामीले निर्णय गरिसकेका छैनौं । तर, हामीले त्यस्तो पार्टीलाई किन बोलाउछौं र ? हाम्रो पार्टीलाई तोडेर, फोडेर, हाम्रो पार्टीको सरकारलाई गिराएर त्यस्तो अनुशासनहीन व्यक्तिहरुको पार्टीलाई मान्यता दिने हो भने हाम्रो पार्टीभित्र कसरी अनुशासन कायम हुन्छ ? अहिले उहाँहरुलाई हाम्रो महाधिवेशनमा बोलाउन आवश्यकत्ता छ जस्तो अहिले देखिएको छैन् ।’ प्रस्तुत छ नेता गुरुङसँग पत्रकार धमलाले गरेको कुराकानीको सम्पादित अंश :
नेकपा (एमाले)को महाधिवेशनमा प्रतिनिधि छनोट गर्दा केन्द्र हाबी भएको देखियो, किन यस्तो भयो ?
महाधिवेशनको विधि, प्रक्रिया र पद्धती त केन्द्रकै मान्नपर्यो नि होइन् र ?
तर, स्थानीयस्तर र जिल्लाबाट प्रतिनिधि छनोट गर्दा जनताको चाहनाअनुरुप छनोट हुने होइन र ?
स्थानीय जनता भन्ने हुँदैन् । त्यहाँ हाम्रो पार्टीका सदस्यहरुबाट निर्वाचित हुने हो । सबै ठाउँमा व्यापक रुपमा छलफल गरेर सहमतिको आधारमा प्रतिनिधिहरु छनोट भएका छन् ।
केपी शर्मा ओलीले जसलाई प्रतिनिधि बनाउन चाहनुभयो त्यहीअनुरुप भयो भन्छन् ?
होइन्, तपाईंले मैले भनेको बुझ्नुभएन ? कति गते कुन ठाउँमा कसरी गर्ने ? अनिा कति जना पार्टीको प्रतिनिधि आउने भनेर केन्द्रले नै तोकेको हुन्छ । केन्द्रको मापदण्डको आधारमा हुन्छ । प्रदेश कमिटीको चाहीँ प्रदेशले नै निर्वाचनको आयोजना गर्छ । जनसंगठनबाट ५ जना आउने जनसंगठनले त्यसको जिम्मा लिएको हुन्छ । केन्द्रबाट त्यसरी एउटा व्यक्तिले भनेर भएको छैन् ।
नेकपा (एमाले) लोकतन्त्रलाई विश्वास गर्ने पार्टी हो तर, कार्यकर्ताहरुले प्रतिष्पर्धा गरेर नेतृत्व चयन गर्न पाएनन् नि ?
होइन् होइन्…. त्यसो होइन् । बहुमत र अल्पमतको आधारमा निर्णय गर्दा मात्र लोकतान्त्रिक हुन्छ र ? लोकतन्त्रमा सबैभन्दा राम्रो कुरा भनेको नै सर्वसम्मत् हो । सर्वसम्मत् भएन भनेमात्र बहुमत र अल्पमतको आधारमा नेतृत्व चयन गर्ने हो । यसपटक हाम्रो पार्टीमा धेरै ठाउँमा सर्वसम्मत् रुपमा निर्वाचित भएका छन् । केही ठाउँमा मात्र प्रतिस्पर्धा भएको हो ।
तपाईंहरु चिनियाँ मोडलमा जानुभएको हो ?
यो नहुने कुरा तपाईं किन जोड्नुहुन्छ ? हामीले जुन ढंगले गरेका छौं, त्यो भनेको एकदम लोकतान्त्रिक विधि हो । हामीले लोकतान्त्रिक विधिबाट गरेका छौं ।
तर, जनताले आफूले चाहेका मान्छेहरु ल्याउन पाएनन् नि त ?
त्यसो होइन्, नेपाली काँग्रेसले हामीभन्दा पहिला सुरु गरेको अझैसम्म गर्र्न सकेको छैन् । हाम्रो त तोकिएको समयमा भएको छ । हाम्रो जुनदिन भएको थियो त्यहीदिन सम्पन्न भएको छ । सम्पन्न नभएको केही ठाउँहरुमा आज सम्पन्न हुन्छ ।
तपाईंको पार्टीमा केपी शर्मा ओलीले जे भन्नुभयो त्यही हुन्छ, होइन् ?
हाम्रो पार्टी कति लोकतान्त्रिक र व्यवस्थित् पार्टी रहेछ भन्नु न । एकै दिनमा सबै ठाउँमा नेतृत्व चयन गर्नसक्यो । यो साधारण कुरा होइन । नेपालमा यो काम नेकपा (एमाले) ले मात्र गर्न सक्छ, नेकपा (एमाले) बाट सबै पार्टीले सिक्नुपर्छ । जिल्लावासीले व्यापक रुपमा छलफल गरेरमात्र प्रतिनिधि छनोट गरेका छन् । केही सर्वसम्मत् रुपमा हुन नसकेका ठाउँहरुमा प्रतिष्पर्धा पनि भएको छ । केपी शर्मा ओलीले सकेसम्म झगडा नगर मिलेर अघि बढ्नुपर्छ भन्नुभएको हो । उहाँले रामबहादुर र धनबहादुर ल्याउँ भनेर भन्नुभएको होइन् । उहाँले आफ्ना नेता÷कार्यकर्तालाई सकेसम्म मिलेर जानुपर्छ भन्नुभएको हो ।
उसोभए केपी शर्मा ओली फेरी पनि नेकपा (एमाले)को अध्यक्ष बन्ने पक्का होइन् त ?
त्यो त शतप्रतिशत निश्चित् नै हो नि ।
नेकपा (एमाले) मा केपी शर्मा ओलीको विकल्प छैन् ?
हो, अहिलेलाई उहाँको विकल्प छैन् ।
तर, भीम रावल र घनश्याम भुसालले हामी केपी शर्मा ओलीसँग प्रतिस्पर्धा गर्छौं भन्नुभएको छ ?
हाम्रोजस्तो लोकतान्त्रिक पार्टीमा जसले पनि उम्मेद्वारी दिन पाउँछ । मैले भनेको के हो भने चुनाव पनि हुनसक्छ तर जित्ने भनेको केपी शर्मा ओलीले नै हो ।
त्यसोभए नेकपा (एमाले) मा अध्यक्षको निर्वाचन हुन्छ ?
निर्वाचन हुनपनि सक्छ । नेकपा (एमाले) मा निर्वाचन नहुने भन्ने केही छ र ?
तर, केपी शर्मा ओलीको चाहना भनेको सर्वसम्मत् रुपमा अध्यक्षमा चयन हुने हो नि, होइन र ?
चाहना हुने भनेको एउटा कुरा हो । तर, सर्वसम्मत् भएपनि नेता नै हो । बहुमतले निर्वाचित भएपनि नेता नै हो ।
वडा र जिल्ला अधिवेशनमा उहाँले भनेअनुसार नै भएको छ, अब उहाँले आफुलाई सर्वसम्मत् अध्यक्ष बनाउन सक्नुहोला ?
केपी शर्मा ओली पार्टी अध्यक्ष हुनुहुन्छ । उहाँले पार्टीको कुरा सुनाउनुभएको हो । सर्वसम्मत् रुपमा छनोट गर्ने भन्ने कुरा हाम्रो केन्द्रीय कमिटी र स्थायी समितिले निर्णय गरेको हो । यसपटक परिस्थिति धेरै जटिल रहेको छ । चाँडै सक्नुपर्छ । चुनाव धेरै नजिक आइसकेको छ । चुनावको तयारी गर्नुपर्छ भनेर हाम्रो पार्टीले निर्णय गरेको हो । त्यही निर्णयलाई उहाँले भन्नुभएको हो । उहाँले सर्वसम्मत् गर भनेर निर्देशन दिनुभएको होइन् । उहाँले सकेसम्म महाधिवेशन सभ्य तरिकाले गरौं भनेर भन्नुभएको हो । यसलाई त्यसरी बुझ्नुहुँदैन् । महाधिवेशनमा उहाँ नै अध्यक्षमा निर्वाचित हुनुहुन्छ ।
नेकपा (एमाले)को महाधिवेशनमा माधवकुमार नेपालको पार्टीलाई अवैध भन्दै नबोलाउने घोषणा गर्नुभयो, यो काम गलत भएन र भन्या ?
होइन्, त्यो त हाम्रो कुरा हो नि । हाम्रो महाधिवेशनमा कसलाई बोलाउने अनि कसलाई नबोलाउने भन्ने त हाम्रो कुरा हो नि । यसमा हामीलाई कसैले निर्देशित गर्ने होइन् । हामी यो मुलुकको सबै राजनीतिक दलहरुलाई पठाउँछौं । तर, त्यो पार्टीलाई बोलाउने अथवा नबोलाउने भन्ने कुरा हामीले निर्णय गरिसकेका छैनौं । तर, हामीले त्यस्तो पार्टीलाई किन बोलाउछौं र ? हाम्रो पार्टीलाई तोडेर, फोडेर, हाम्रो पार्टीको सरकारलाई गिराएर त्यस्तो अनुशासनहीन व्यक्तिहरुको पार्टीलाई मान्यता दिने हो भने हाम्रो पार्टीभित्र कसरी अनुशासन कायम हुन्छ ?
उसोभए नेकपा (एकीकृत समाजवादी) लाई नेकपा (एमाले) को महाधिवेशनमा नबोलाउने ?
बोलाउन आवश्यकत्ता छ जस्तो अहिले देखिएको छैन् ।
हिजो माधवकुमार नेपालले नेकपा (एमाले) ले कम्युनिष्ट आन्दोलनलाई कमजोर बनायो भन्नुभयो, यस विषयमा तपाईं के भन्नुहुन्छ ?
उहाँहरुले सराप त गरिरहनुभएको छ नि । तर, उहाँहरुको सरापले हामी सकिँदैनौ नि । हामी सकिने भनेको हाम्रो असफलताले हो । उहाँहरुको गालीले हामीलाई केही पनि हुँदैन् ।
तर, यसले तपाईहरुलाई घाटा लाग्छ नि । उहाँले भन्नुभएको छ–अब नेकपा एमालेलाई हामी एक सिट पनि जित्न दिँदैनौं भनेर ?
लागेर के भएको छ र ? उहाँ त जहिले पनि यसमै लाग्नुभएको थियो नि ।
अगामी निर्वाचनमा गठबन्धनले तपाईंहरुबिरुद्ध साझा उम्मेद्वारी तयार गर्ने रे ? तपाईँहरुको के छ तयारी ?
त्यो त नेपाली जनताले राम्रोसँग हेर्ने हो । माधवकुमार नेपालले के गरेका छन्, प्रचण्डले के गरेका छन्, शेरबहादुरजीले के गरेका छन्, केपी शर्मा आलीले के गरेका छन् ? यो कुरा त जनताले हेर्ने कुरा हो । हामी नेपाली जनताको सबैभन्दा लोकतान्त्रिक पार्टीको रुपमा स्थापित रहेका छौं । जनतामाँझ हामी लोकप्रिय रहेका छौं । त्यहीभएर सबैजनालाई डाहा भएको छ । धरै मान्छेहरुले हाम्रो विरुद्धमा चलखेल गरेका छन् । त्यसैको परिणामस्वरुप अहिले गठबन्धन बनेको छ । त्यसलाई पराजित गर्नु नै हाम्रो मुख्य काम हो । एकातिर जनताको पक्षधर नेकपा (एमाले) रहेको छ भने अर्कोतिर विदेशी शक्तिको इशारामा चल्ने शक्तिहरु रहेका छन् । त्यो शक्तिहरुलाई पराजित गर्न अथवा उनीहरुसँग लड्न हामी स्पष्ट हुनुपर्ने आवस्यकता रहेको छ ।
