एजेन्सी, २३ मङ्सिर। बेलायती प्रधानमन्त्री बोरिस जोनसोनकी सल्लाहकार एलेग्रा स्ट्राटोनले राजीनामा दिएकी छिन्। जोनसोनले लकडाउनको समयमा पार्टी आयोजना गरेको एक भिडियो सार्वजनिक भएसँगै चौतर्फी आलोचना बढेपछि सल्लाहकार एलेग्रा स्ट्राटोनले राजीनामा दिएकी हुन् ।
जलवायु सम्मेलन कोप २६ मा बेलायत सरकारकी प्रवक्ता समेत रहेकी उनले बुधबार राजीनामा दिएको बताइएको छ । संसारभर कोरोना महामारीले विकराल रुप लिइरहँदा बेलायतका प्रधानमन्त्री जोन्सनसहित उनका सहकर्मी र सहपाठीहरुले गतवर्ष क्रिस्मसमा पार्टी मनाएको एक भिडियो फुटेज सार्वजनिक भएको थियो ।
डाउनिङ स्ट्रिटमा आयोजित उक्त पार्टीमा उपस्थितहरुले हँसी मजाक गरिरहेका थिए भने कतिपय वाइन र खानपानमा व्यस्त देखिन्थे । उक्त भिडियो सम्बन्धमा प्रधानमन्त्री जोनसोनले बुधबार आममाफी मागिसकेका छन् । उनकी सल्लाहकार स्ट्राटनले भने माफीको सट्टा राजीनामा दिएको बताएकी छिन् । आफूले दिएको राजीनामा नै सबैभन्दा ठूलो माफी हुने उनले बताएकी छिन् ।-Photo: Agency
