काठमाडौं, २३ मंसिर । संस्थापनइतर समूहले साझा उम्मेदवार दिन नसक्दा नेपाली काँग्रेसका सभापति शेरबहादुर देउवा उत्साही छन् । समय बित्दै जाँदा माहोल झन् आफ्नो पक्षमा बढ्ने उनको आँकलन छ ।
संस्थापन इतर समूहबाट धेरै उम्मेदवार बन्दा पहिलो चरणमै बाजी मार्न सक्ने देउवा पक्षको विश्लेषण देखिन्छ । तर, देउवा ढुक्क छैनन् । रातारात संस्थापनइतर समूह एक भई आफूविरुद्ध छापामार शैलीमा महाधिवेशनमा होमिएमा देउवाको हालत राष्ट्रिय प्रजातन्त्र पार्टीमा कमल थापाको जस्तै हुनसक्छ । थापाले जसरी नसोचेको परिणाम आयो देउवालाई त्यस्तै हुनसक्छ ।
संस्थापन इतर समूहबाट ४ जना सभापतिको दाबेदार देखिएकोमा घटेर २ जना पुगेका छन् । वरिष्ठ नेता रामचन्द्र पौडेल ब्याक भएर सबैले छाडेमा मात्र तयार देखिएका छन् ।
अब प्रकाशमान सिंह र डा. शेखर कोइरालाबीच रस्साकस्सी चलिरहेको छ । त्यो कहिलेसम्म चल्ने हो चासो बनेको छ । महाधिवेशनको मनोनयन दर्ता अघि या लगत्तै एउटा उम्मेदवार ब्याक हुने सम्भावना पनि छ । त्यसका लागि पावर सेयरिङको विषय चलिरहेको छ । कुरा मिल्न सकेको छैन ।
संस्थापन इतरबाट साझा उम्मेदवार बनेमा उनीहरु बहुमतको नजिक पुग्न सक्छन् । तर, समूहभित्र इमान्दारिता अनिवार्य भएमात्र । साझा उम्मेदवारले माहोल सृजना गर्न सक्छ । जसले संस्थापन पक्षको मत रातारात पल्टनसक्छ ।
देउवासँग तत्काल एकल बहुमत छैन । उनले विकल्पहरु हेरिरहेका छन् । पूर्वमहामन्त्री कृष्णप्रसाद सिटौलालाई मिलाएर लाने योजनामा छन् । तर, सिटौलाको मत जोड्दा पनि बहुमत नपुग्नसक्छ । अर्कोतर्फ, सिटौला आफै दाबेदार छन् । उनी पनि मौकाको पर्खाइमा छन् ।
देउवाले संस्थापनइतरमा कुरा नमिल्दा प्रकाशमान सिंह या कोइराला परिवारका कुनै सदस्यलाई तान्ने रणनीति पनि बनाएको बुझिएको छ । सिंह अडानका पक्का भएकाले सम्भावना कमजोर छ । तर, राजनीतिमा असम्भव भन्ने हुँदैन । कोइराला परिवारका सदस्य देउवासँग मिलिहाल्ने सम्भावना पनि कमजोर छ । शक्तिको बाँडफाँडका क्रममा त्यो सम्भावना पनि रहन्छ ।
संस्थापन इतर समूह एकजुट भई यताउता नभए देउवालाई अर्को कार्यकाल सभापति बन्नबाट रोक्ने माहोल सृजना हुनसक्छ । रातारात पासा पल्टन सक्छ । उम्मेदवार जो भएपनि संस्थापनइतरभित्र इमान्दारिताका साथ महाधिवेशनमा मत खसे देउवाको पुनः सभापति बन्ने सम्भावना लगभग समाप्त हुनसक्छ ।
देशभरको मत परिणाम हेर्दा सभापतिका आकांक्षी वरिष्ठ नेता रामचन्द्र पौडेल र महामन्त्री डा.सशांक कोइरालाले गण्डकी र लुम्बिनीमा बलियो पकड बनाएका छन् । त्यहाँ संस्थापन पक्षलाई इतर समूहले पछाडि पारेको छ । प्रदेश १ मा डा. शेखर कोइरालाले संस्थापनसँग उस्तै अवस्था बनाएको छ । त्यहाँ देउवा र सिटौला मिल्दा पनि इतर समूहसँग केही मतले पछाडि छ । इतर समूहका केन्द्रीय सदस्यहरुले प्रदेशमा मतदान नगरेकोले मात्र पछि परेको हो । बागमती प्रदेशमा पूर्वमहामन्त्री प्रकाशमान सिंहले विगतभन्दा बलियो पकड बनाएका छन् । बागमतीमा सिटौला पक्ष विगतभन्दा कमजोर भएको छ । प्रदेश चुनावको नतिजामा संस्थापनले जितेपनि महाधिवेशन प्रतिनिधिमा इतर समूह केही मतले अगाडि देखिन्छ ।
सुदूरपश्चिम प्रदेशमा देउवा निकै बलियो स्थितिमा छन् । कर्णालीमा केही बलियो छन् । यो मतलाई केलाउँदा प्रदेश २ को मत निर्णायक हुनसक्छ । प्रदेश २ मा देउवा ढुक्क छैनन् । त्यहाँको ठूलो मत कुनैपनि बेला फरक धारमा पल्टनसक्छ । प्रदेश २ को ८ सय मतमध्ये कम्तिमा साँढे ३ सय मत आफ्नो पक्षमा पार्न सके देउवा सफल हुनसक्छन् । तर, त्यसमध्ये केही मत तल पर्ने वित्तिकै सभापतिको प्रतिष्पर्धा कठिन हुनसक्छ । देशभरको मतको आँकडा हेर्दा पौडेल, सिंह र कोइरालाद्वय एक भएर साझा उम्मेदवार तय गरेमा परिस्थिति बदलिन सक्छ । पासा रातारात पल्टनसक्छ ।
