काठमाडौं, ८ पुस । प्रधानमन्त्री कप महिला राष्ट्रिय क्रिकेट प्रतियोगितामा सुदुरपश्चिम प्रदेश सेमिफाइनलमा प्रवेश गरेको छ ।
धनगढीको स्थित फाप्ला क्रिकेट मैदानमा आज ( बिहिबार) प्रदेश नं. २ माथि ८७ रनको जित निकाल्दै सेमिफाइनल प्रवेश गरेको हो ।
सुदुरपश्चिमले दिएको १ सय ४४ रनको लक्ष्य पछ्याउने क्रममा प्रदेश २ ले निर्धारित २० ओभरमा ८ विकेटको नोक्सानीमा ५६ रन मात्र जोड्न सक्यो ।
प्रदेश २ का लागि साना प्रविणले सर्वाधिक १४ तथा बिमला मगरले १२ रन मात्र जोड्न सकिन् ।
सुदुरपश्चिमका लागि कविता जोशी र लक्ष्मी साउदले समान दुई–दुई तथा इश्वरी विष्टले एक विकेट लिईन् ।
यस अघि पहिले ब्याटिङ गरेको सुदुरपश्चिमले निर्धारित २० ओभरमा ५ विकेटको नोक्सानीमा १ सय ४३ रन जोडेको थियो ।
सुदुरपश्चिमका लागि विन्दु रावलले अविजित ५० रन जोड्न सफल भइन् ।
यस्तै, रुवी पोदारले २१ तथा डोली भट्टले १५ रन जोडिन् ।
प्रदेश २ का लागि बिमला मगरले सर्वाधिक २ विकेट लिइन् भने अनुराधा चौधरी र सानु प्रविणले समान एक–एक विकेट लिए ।
यस हारसँगै प्रदेश २ प्रतियोगिताबाट बाहिरिएको छ ।
यस्तै, सुदुरपश्चिमले तीन मध्ये दुई खेलमा जित निकालेको छ ।
