काठमाडौं, १० पुस । सहिद स्मारक ‘ए’ डिभिजन लिग अन्तरगत आज भएको पहिलो खेलमा हिमालयन शेर्पा क्लबले रोमान्चक जित निकालेको छ ।
त्रिपुरेश्वर स्थित दशरथ रंगशालामा भएको खेलमा हिमालयन शेर्पाले च्यासल युथ क्लबलाई ३–१ गोल अन्तरले पराजीत गरेको हो ।
खेलको २४औं मिनेटमा मुटाम्बा पिस्टोनेले गोल गर्दै हिमालयनलाई सुरुवाति अग्रता दिलाएका थिए ।
यस्तै, ५६औं मिनेटमा मुटाम्बाले व्यक्तिगत दोस्रो गोल गर्दै टोलीको अग्रता दोब्बर बनाए ।
खेलको ७५औं मिनेटमा च्यासलका रुमेस बर्तौलाले गोल गर्दै खेललाई २–१ को अवस्थामा ल्याएका थिए ।
तर, खेलको ७९औं मिनेटमा सुरेश कुमालले गोल गर्दै हिमालयनलाई जित दिलाए ।
यस जितसँगै हिमालयन ८ अंकका साथ छैठौं स्थानमा उक्लिएको छ भने च्यासल १३औं स्थानमा छ ।
