काठमाडौं, १५ पुस । नेपालको अनलाइन भुक्तानी सेवा प्रदायक ‘खल्ती’ले तिलाठी कोईलाडी गाउँपालिकासँग सम्झौता गरेको छ । सम्झौतापछि गाउँपालिकाले करिब साढे चार हजार किसान परिवारलाई आर्थिक अनुदान स्वरुप सिँचाइ र कृषि प्रयोजनमा विद्युतीय उपकरण प्रयोग गरेबापत किसानको कृषि मीटर महसुल तथा घरको बिजुलीको महसुल तिर्ने जनाएको छ ।
सो योजनाको कार्यान्वयनमा ‘खल्ती’ ले डिजिटल प्रविधिबाट भुक्तानीमा सहयोग गर्ने छ । सप्तरी जिल्लाको दक्षिणपूर्वी पूर्वी भेगमा अवस्थित तिलाठी कोईलाडी गाउँपालिकामा यसअघि सिंचाइ र खेतीका लागि किसानले अधिकतम शुल्क पर्ने डिजल उपकरणबाट कृषिका काम गरिरहेका थिए ।
यो आर्थिक अनुदान कार्यान्वयनमा आएसँगै अब न्युनतम शुल्कमा आधुनिक प्रविधि प्रयोग गरि विभिन्न कृषिजन्य कामका लागि विद्युतीय उपकरणहरु प्रयोग गर्न सक्नेछन् ।
यस योजनाअन्तर्गत तिलाठी कोईलाडी गाउँपालिकाले प्रति घर वार्षिक अनुदान एक हजार दुई सय रुपैयाँ कृषि मीटरको महसुल भुक्तानीका साथै प्रति घरको प्रति महिनाको बिजुलीको महसुल ५० रुपैयाँ अनुदान दिने भएको छ।
