एजेन्सी, १६ पुस । स्पेनमा पछिल्लो २४ घण्टामा १ लाख ६१ हजार ६८८ नयाँ कोरोना संक्रमित थपिएका छन् । त्यसैगरी पछिल्लो २४ घण्टामा यो भाइरसका कारण ७४ जनाको मृत्यु भएको छ । योसँगै स्पेनमा मृत्यु हुनेको संख्या ८९ हजार ४०५ पुगेको छ । स्पेनको राष्ट्रिय स्वास्थ्य मन्त्रालयका अनुसार हालसम्म ६२ लाख ९४ हजार ७४५ जनामा कोरोना संक्रमण देखिएको छ ।
युरोपले ओमिक्रोनको कारण धेरै देशहरू कोरोनाको पाँचौं लहरको सामना गरिरहेका छन् । यसबारे डब्लुएचओले चेतावनी जारी गर्दै डेल्टा र ओमिक्रोन भेरियन्टको यस्तो सुनामी आउने भन्दै स्वास्थ्य प्रणाली विनाशको छेउमा पुग्ने बताउँदै आएको छ ।
दक्षिण अफ्रिकाले रातको कर्फ्यू हटायो
दक्षिण अफ्रिकामा रात्रि कर्फ्यू हटाइएको छ। सरकारले कोरोनाको चौथो लहरको उत्कर्ष सकिएको विश्वास गरेको छ । तर, त्यहाँको इन्डोर कार्यक्रममा १ हजार र बाहिरी कार्यक्रममा २ हजार मात्रै सहभागी हुन पाउनेछन् । दक्षिण अफ्रिकाको स्वास्थ्य विभागका अनुसार अघिल्लो हप्ताको तुलनामा देशमा नयाँ केसहरूमा २९.७ प्रतिशतले कमी आएको छ। अफ्रिकामा हालसम्म कुल ३५ लाख कोरोनाका घटना र ९१ हजारको मृत्यु भएको छ ।
संक्रमणका कारण अमेरिकामा पनि उडान प्रभावित, करिब एक हजार उडान रद्द
अमेरिकामा कोरोना र ओमिक्रोनको बढ्दो संक्रमणले उडान सञ्चालनमा पनि असर गरिरहेको छ । बिहीबार राति प्रकाशित न्यूयोर्क टाइम्सको रिपोर्ट अनुसार देशमा झण्डै १ हजार उडान रद्द गरिएको छ। जसको कारण चाडपर्वमा यात्रुहरुले निकै सास्ती खेप्नु परेको छ । एयरलाइन्स कम्पनीहरूसँग कर्मचारीको अभाव छ। कम्पनीहरुले धेरै प्रयास गरेपनि कर्मचारी समायोजनमा समस्या छ । तर, हिमपात र खराब मौसम पनि उडान रद्द हुनुको कारण हो । शुक्रबार ५०० उडान रद्द हुने अनुमान गरिएको छ ।
अमेरिकामा ओमिक्रोनको बढ्दो केसका कारण कोरोनाको केस लगातार बढिरहेको छ । न्यूयोर्क टाइम्सका अनुसार बुधबार यहाँ कोरोनाको रेकर्ड ४.८८ लाख नयाँ केस दर्ता भएका छन् र १२ सय ७ जनाको मृत्यु भएको छ। मंगलबार यहाँ ३ लाख ८८ हजार कोरोना संक्रमित भेटिएका छन् । पछिल्लो २ हप्तामा अमेरिकामा अस्पताल भर्ना हुने बिरामीको संख्या ११% ले बढेको छ।
त्यस्तै, चीनको शान्सी प्रान्तको सियान सहरमा सबै कडाइका बाबजुद पनि संक्रमितको संख्या बढ्दै गएको छ । देशको आधिकारिक पत्रिकाका अनुसार बिहीबारसम्म यहाँ १११७ जनामा संक्रमण देखिएको छ । बिहीबार जम्मा १ सय ५५ जना संक्रमित भेटिएका छन् । स्थानीय तहमा संक्रमण तीव्र गतिमा फैलिरहेको छ । शहरको जनसंख्या १ करोड ३० लाख छ।
