पाँचथर, २५ पुस : पाँचथरमा राजकुमार भण्डारीको अध्यक्षतामा ९० सदस्यीय जिल्ला कमिटी निर्वाचित गर्दै नेकपा (एमाले) को आठौं जिल्ला अधिवेशन आज सम्पन्न भएको छ । एमालेका केन्द्रीय सदस्यहरू र प्रदेश सदस्यहरू रहेको अध्यक्ष मण्डलले प्रस्ताव गरेअनुसार ९० सदस्यीय जिल्ला कमिटी सहमतिमा निर्वाचित भएको हो । बन्दसत्रले ७५ सदस्यीय कमिटी गठन गर्ने प्रस्ताव स्वीकृत गरेको भए पनि उक्त कमिटीमा सबै आकाङ्क्षी नसमेटिने भएपछि संख्या बढाइएको एमालेले जनाएको छ । उक्त कमिटीको उपाध्यक्षमा धनकुमार फियाक, सचिवमा विष्णुप्रसाद सापकोटा (विमल), उपसचिवमा नरबहादुर गुरुङ र पृथ्वी लावती रहेका छन् ।
एमालेका केन्द्रीय सदस्य एवं पाँचथर इन्चार्ज वसन्तकुमार नेम्वाङको अध्यक्षतामा रहेको पाँच सदस्यीय अध्यक्ष मण्डलले पदाधिकारी सहित जिल्ला कमिटीका सदस्य तथा जिल्ला परिषद्का पदाधिकारी र सदस्यको प्रस्ताव बन्दसत्रमा पेस गरेको थियो । यस क्रममा बन्द सत्रका सहभागी प्रतिनिधिले उक्त प्रस्तावलाई स्वीकृत गरेका थिए ।
सहभागीको स्वीकृतिपछि प्रस्तावित पदाधिकारी तथा सदस्यले भएको मनोनयन दर्ता गराएपछि सहमतिमा नेतृत्व चयन भएको एमाले पाँचथरको निर्वाचन समितिका मुख्य निर्वाचन अधिकृत कृष्णकुमार आङ्देम्बेले जानकारी दिए ।
यस्तै एमाले पाँचथरका निवर्तमान उपाध्यक्ष एवं हिलिहाङ गाउँपालिकाका अध्यक्ष भवानीप्रसाद लिङ्देनको अध्यक्षतामा एमाले पाँचथरको ५१ सदस्यीय जिल्ला सल्लाहकार परिषद् गठन गर्ने प्रस्ताव समेत बन्द सत्रले पारित गरेको छ । उक्त परिषद्मा जिल्ला कमिटीमा नपरेका अगुवा नेताहरू, विभिन्न क्षेत्रमा विज्ञता हासिल गरेका पार्टीसँग आबद्ध व्यक्तिहरू तथा ज्येष्ठ कम्युनिस्ट नेताहरू समावेश भएका छन् ।
नवनिर्वाचित कमिटीलाई एमालेका केन्द्रीय सदस्य एवं जिल्ला इन्चार्ज नेम्वाङ, केन्द्रीय सदस्य एवं सहइन्चार्जद्वय अइन्द्रसुन्दर नेम्वाङ र श्रीप्रसाद जबेगू सहितका नेताहरूले अबिर माला सहित बधाई ज्ञापन गरेका छन् । शुक्रवार सुरु भएको एमाले पाँचथरको अधिवेशनमा ६०७ जना प्रतिनिधिहरू सहभागी थिए । न्युज कारखाना
