काठमाडौं, ५ माघ । टिपरले मोटरसाइकललाई ठक्कर दिँदा चालकको मृत्यु भएको छ । टिपरको ठक्करबाट मोरङ पथरी घर भएका २७ वर्षीय प्रकाश लिम्बुको मृत्यु भएको प्रहरीले जनाएको छ । मंगलबार राति ११ बजे तीनकुनेबाट कोटेश्वर जाँदै गरेको प्रदेश–३–०२६प १८२४ नम्बरको मोटरसाइकललाई टिपरले ठक्कर दिएको थियो ।
ना १ क ४५०२ नम्बरको टिपरले मोटरसाइकललाई ठक्कर दिँदा लिम्बु सख्त घाइते भएका थिए। उनको उपचारका क्रममा राष्ट्रिय ट्रमा सेन्टरमा मृत्यु भएको हो ।
मोटरसाइकलको पछाडि बसेका दुर्घटनामा गम्भीर घाइते भएका काभ्रेका ३१ वर्षीय देव लामाको ट्रमा सेन्टरमा उपचार भइरहेको प्रहरीले जनाएको छ । चालकसहित टिपरलाई प्रहरीले आज बिहान नियन्त्रणमा लिएको छ ।
