काठमाडौँ, २१ माघ। मधेश प्रदेशमा हावाहरीसहित भएको वर्षाका कारण तीन जनाको मृत्यु भएको छ । हिजो (बिहीबार) रातिदेखि सुरू भएको वर्षास्हितको हावाहुरीमा परी तीन जनाको मृत्यु भएको प्रदेश प्रहरी कार्यालय जनकपुरले जनाएको छ । हावाहुरीले रूख ढल्दा धनुषामा दुई विद्यार्थी र घर ढल्दा रौतहटमा एक महिलाको मृत्यु भएको प्रहरीले जनाएको हो ।
धनुषाको सबैला नगरपालिका—१२ स्थित फकिरचन्द उच्च माविको प्रांगणमा रहेको रूख ढल्दा ८ वर्षीया प्रतिमा कुमारी सदा र ७ वर्षिय अरबन्दी सदाको मृत्यु भएको धनुषाका एसपी बसन्त रजौरेले जानकारी दिए । उनका अनुसार हावाहुरीले अचानक मसालाको रुख ढल्दा दुबै जनाको टाउकोमा चोट लागि घटनास्थलमै मृत्यु भएको थियो ।
यस्तै, रौतहटको बौधीमाई नगरपालिका—१ स्थित इँटाको घर खस्दा ४५ वर्षीया फुलमतीया देवीको मृत्यु भएको जिल्ला प्रहरी कार्यालय रौतहटले जनाएको छ । बिहीबार साँझदेखि देशभर हल्का वर्षासँगै पहाडी तथा उच्च हिमाली क्षेत्रमा बाक्लो हिमापात भएको छ । वर्षा र हिमपातका कारण चिसो बढेको छ । शुक्रबार बिहानैदेखि वर्षा देशका अधिकांश जिल्लामा वर्षा भइरहेको छ ।
