एजेन्सी, ९ फागुन । बलिउड स्टार सोनू सुदमाथि पञ्जाबमा ठूलो कारबाही भएको छ । निर्वाचन आयोगले उनको गाडी जफत गरी प्रहरी चौकीमा थुनेर उनलाई घरमै बस्न सुझाव दिएको छ । सोनु सुदमाथि मतदानका क्रममा बुथ र सहरमा घुमफिर गरेर मतदातालाई प्रभावित गरेको आरोप लागेको हो ।
सुदकी बहिनी मालविका सूद कांग्रेसको टिकटमा मोगाबाट चुनाव लडेकी छिन् । सोनु सूदले मोगा सिटमा भोट खरिद भइरहेको आरोप लगाएका छन् । सुदले निर्वाचन आयोगसँग कारबाही गर्न पनि माग गरेका छन् ।
सोनु सुदको कार मोगाको प्रहरी चौकीमा पार्क गरिएको छ । मोगाबाट अकाली दलका उम्मेदवारका पोलिंग एजेन्टले सोनु सूदले मतदातालाई प्रभावित गरिरहेको भन्दै निर्वाचन आयोगमा गुनासो गरेका थिए। यो थाहा पाएपछि निर्वाचन आयोगको टोलीले उनलाई पछ्याउन थाल्यो । जसमा आरोपको प्रारम्भिक पुष्टि भएपछि आयोगको टोलीले उनलाई बाटोमै रोकेको थियो । उनको कार जफत गरी अर्को गाडीमा घर पठाइयो। यदि सोनु सूदले साँच्चै मतदातालाई प्रभाव पारेको पुष्टि भयो भने उनलाई कारबाही हुनेछ ।
यस विषयमा सोनु सूदले आफूले मतदातालाई कतै पनि प्रभावित नगरेको स्पष्ट पारेका छन् । उनले समर्थकबाट रिपोर्ट मात्र लिइरहेका थिए । सुदले विभिन्न बुथमा गएर मतदातालाई भेट्ने गरेको विपक्षी बताउँछन् ।
