काठमाडौं, फागुन १५ । संसद्मा पेस भएको अमेरिकी मिलेनियम च्यालेन्ज कर्पोरेसन (एमसीसी) सम्झौता पारित गर्न सत्तारुढ दल नेकपा (माओवादी केन्द्र) र नेकपा (एकीकृत समाजवादी) पार्टी लचक भएका छन् ।
संशोधनविना एमसीसी पारित नगर्ने अडान लिँदै आएका माओवादी र एकीकृत समाजवादीले व्याख्यात्मक घोषणा गरेर एमसीसी पारित गर्न लचक भएका हुन् ।
एमसीसी संसद्मा पेस भएसँगै सत्ता गठबन्ध नै संकटमा परेको भन्दै सत्ता गठबन्धन जोगाउने र एमसीसी पनि पारित गर्ने गृहकार्य तीव्र भएको छ । सरकारको नेतृत्व गरिरहेको कांग्रेसले निरन्तर रुपमा प्रतिपक्षसँग संवाद अगाडि बढाएसँगै एमसीसीको विपक्षमा मतदान गर्ने अडान लिँदै आएका माओवादी र एकीकृत समाजवादी एमसीसी पारित गर्ने र सत्ता गठबन्धन जोगाउने निष्कर्षमा पुगेका हुन् ।
सत्ता गठबन्धन जोगाउन माओवादीका अध्यक्ष पुष्पकमल दाहाल ‘प्रचण्ड’ ले शनिबार साँझ एकीकृत समाजवादीका शीर्ष नेताहरुसँग छलफल गरेका थिए । पार्टीभित्र आन्तरिक गृहकार्य गरेर प्रचण्डले अन्ततः गठबन्धन जोगाउने नै निष्कर्षमा पुगेको बताइएको छ । संसदमा टेबल भईसकको एमसीसी अनुमोदन प्रक्रिया अघि बढाउन आज दिउँसो १ बजे प्रतिनिधि सभाको बैठक बस्दैछ।
