काठमाडौं, १९ फागुन । नेपालले संयुक्त राष्ट्रसंघको विशेष महासभामा रुसी आक्रमणविरुद्ध मतदान गरेको छ । महासभामा युक्रेनमाथि रुसी आक्रमण तत्काल रोक्ने प्रस्ताव बहुमतले पारित हुँदा नेपालले पक्षमा मतदान गरेको हो ।
नेपालसहित १४१ देशले पक्षमा मतदान गरेका थिए । नेपालका तर्फबाट राष्ट्रसंघका स्थायी प्रतिनिधि अमृतबहादुर राईले नेपाल जुनसुकै देशको सार्वभौमसत्ता, भौगोलिक अखण्डता र राजनीतिक स्वतन्त्रताको पक्षमा रहेको बताएका थिए ।
प्रस्तावको विपक्षमा रुस, बेलारुस, उत्तर कोरिया, सिरिया र इरिट्रियाले मतदान गरेका थिए । चीन, भारत, पाकिस्तान, दक्षिण अफ्रिकासहित ३५ देश तटस्थ बसे । राष्ट्रसंघको महासभामा १९३ देश छन् ।
