काठमाडौं, २६ फागुन । नेकपा (एकीकृत समाजवादी) को केन्द्रीय समिति बैठकआजै सम्पन्न हुने भएको छ । महासचिव वेदुराम भुषालले अब हुने स्थानीय तहको निर्वाचनमा पार्टीलाई केन्द्रित गरेर अघि बढ्ने र त्यसको लागि चुनावी कार्ययोजना पारित गरेर केन्द्रीय कमिटी बैठक समापन गर्ने तयारी रहेको सुनाए ।
आज अध्यक्ष माधवकुमार नेपालले पेश गरेको राजनीतिक प्रतिवेदनमाथिको निष्कर्ष पनि सुनाईने भएको छ । अध्यक्षको प्रतिवेदनमाथि समूहगत छलफल भएको थियो । र, आजै अध्यक्ष नेपालले प्रतिवेदनमाथि उठेका प्रश्नको जवाफ पनि दिने कार्यक्रम रहेको छ ।
हिजोबाट सुरु भएको बैठकमा अधिकांश नेताहरुले एमसीसी अनुमोदन गरेकोमा नेतृत्वको आलोचना गरेका थिए । तर, अध्यक्ष नेपालले अब एमसीसी पारित भइसकेको भन्दै यसको कार्यान्वयनतर्फ ध्यान दिनुपर्ने र अब धेरै यो विषयमा अल्झिन नहुने धारणा राखेका थिए।
