काठमाडौं, ४ चैत्र । नेकपा (एमाले) का उपमहासचिव विष्णु रिमालले आफ्नो पार्टीले एक्लै निर्वाचन लड्ने बताएका छन् । उनले एमालेरहित बनाउनेहरुलाई एक्लै चुनाव लड्न चेतावनी दिएका छन् । उनले विप्लव र सिके राउतहरुले चुनाव लड्ने कुरा गर्नु खुशीको कुरा भएको प्रतिक्रिया दिए ।
आज राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले ०७४ सालमा पनि एमालेले स्थानीय तहको निर्वाचन लडेको स्मरण गराए । उनले एमालेले एक्लै तीन तहको निर्वाचन लड्ने र बहुमत ल्याउने दाबी गरे ।
उनले अहिले प्रचण्ड र माधव नेपालले राजनीतिमा च्याँखे थाप्ने काम गरेको आरोप लगाए । उनले एमालेले अब चुनावी घोषणापत्रमा आफूहरु सरकारमा हुँदा गरेका कामको फेहरिस्त सार्वजनिक गर्ने पनि बताए । उनले अबको स्थानीय तहको निर्वाचनमा एमालेले एक्लै चुनाव लडेर ४५ प्रतिशतभन्दा बढि जित्ने दाबी गरे ।
