काठमाडौं, चैत ७ । करोडौं राजस्व छली प्रकरणमा छानबिनमा रहेको भगवती लेमिनेट्स प्रालिका सञ्चालकले अनुसन्धान प्रक्रियालाई प्रभावमा पार्न विभिन्न उपाय अपनाउन थालेका छन् ।
शक्तिकेन्द्र धाउनेदेखि राजस्व अनुसन्धान कार्यालय इटहरीका अनुसन्धान अधिकृतलाई नै प्रभावमा पार्नेगरी चलखेल गरिरहेको दाबी स्रोतको छ । जसका कारण इटहरी कार्यालयले केही समयदेखि यो विषयको अनुसन्धान प्रक्रियालाई समेत तीव्रता दिन सकेको छैन ।
स्रोतका अनुसार इटहरी कार्यालयबाट यस प्रकरणको अनुसन्धानमा खटिएका अनुसन्धान अधिकृत सबै जना झापा निवासी भएकाले उनीहरूले यो अनुसन्धानलाई टुंगोमा पु¥याउन चाहिरहेका छैनन् । भगवती लेमिनेट्सको केन्द्रीय कार्यालय झापामा छ र यसका अधिकांश सञ्चालक पनि झापा निवासी हुन् ।
सञ्चालकले यस प्रकरणलाई आन्तरिक रूपमा मिलाउन अनुसन्धान अधिकृतहरूलाई नै प्रभावमा पार्न थालेको स्रोतको दाबी छ । भवगती लेमिनेट्सको राजस्व छलीको छानबिन गरिरहेको इटहरी कार्यालयले त्यसको प्रतिवेदन राजस्व अनुसन्धान विभागमा पठाउनसमेत आनाकानी गरिरहेको बताइएको छ । विभागका अधिकारीले भने यस प्रकरणलाई गम्भीरतापूर्वक लिइएको दाबी गरेका छन् ।
भगवती लेमिनेट्सका सञ्चालकहरूले भने विभिन्न शक्तिकेन्द्रहरूसँग आपूmहरूको सम्बन्ध रहेकाले जतिसुकै राजस्व छली गरे पनि उम्कन सक्ने भन्दै सरकारी अधिकारीको निष्पक्षतामाथि प्रश्न उठाउने काम गरिहेको बताइन्छ । आर्थिक अपराधबाट उम्कन उनीहरूले विभिन्न खाले सेटिङको प्रयास गरिरहेको र सो सेटिङमा राजस्व कार्यालय इटहरीकै अनुसन्धान अधिकृतसमेत पर्न थालेको चर्चा चल्न थालेको छ ।
राजस्व अनुसन्धान कार्यालय इटहरीले बयानका लागि भगवती लेमिनेट्स प्रालिका सातै जना सञ्चालकलाई बोलाएर औपचारिकता मात्रै निभाएको कार्यालयका कर्मचारीको भनाइ छ । सञ्चालक रजनीश कर्नानी, सन्तोष आचार्य र रतनलाल अग्रवाल बयानका लागि गएका थिए भने बाँकी सञ्चालक निर्मला कर्नानी, निर्मला सरिया, दीपेन्द्रकुमार अग्रवाल र रतनकुमार अग्रवाल हालसम्म पनि बयानका लागि नगएको बताइएको छ ।
इटहरी कार्यालयले अनुसन्धानमा ढिलाइ गरेकाले अब यस प्रकरणलाई राजस्व अनुसन्धान विभागले केन्द्रीय रूपमा नै हेर्नुपर्ने दबाब बढेको छ । इटहरी कार्यालयले अुसन्धानमा ढिलाइ गरेकाले विभागले यस सम्बन्धमा इटहरी कार्यालयसँग आवश्यक जानकारी लिने काम गरिरहेको बताइएको छ ।
छानबिनकै क्रममा राजस्व अनुसन्धान कार्यालयका अनुसन्धान अधिकृतले भगवती लेमिनेट्स प्रालिका सात जना सञ्चालकहरूको सबै बैंक खाता र बैंक स्टेटमेन्ट माग गरे पनि उनीहरूले सबै विवरण दिन आलटाल गरिरहेका छन् । पछिल्लो समयमा इटहरी कार्यालयले पनि उनीहरूमाथि कडाइ गर्न सकेको छैन । राजधानी दैनिकबाट
