काठमाडौं, चैत ७ । आईसीसी विश्वकप लिग–२ अन्तर्गत जारी त्रिकोणात्मक एकदिवसीय सिरिजको आज खेलमा नेपालले घरेलु टोली युएईको सामना गर्दैछ । दुबई अन्तराष्ट्रिय क्रिकेट रंगशालामा हुने खेल नेपाली समय अनुसार अहिले ११ः १५ बजेदेखि शुरु हुदैछ ।
आज हुने खेलमा नेपाल युएईमाथि बदला लिने लक्ष्य साथ मैदान उत्रिनेछ । सिरिजको दोस्रो खेलमा नेपाल युएईसँग ४८ रनले पराजित गरेको थियो । उक्त खेलमा उत्कृष्ट बलिंङ प्रदर्शन गरेपनि ब्याटिङमा चुक्दा नेपाल पराजित हुन पुगेको थियो ।
नेपाललाई आजको खेल जित्दै लिगमा आफ्नो अंक बढाउने अवसरपनि रहेको छ । हाल नेपाल १० खेलबाट १० अंक जोड्दै लिगको छैटौं स्थानमा रहेको छ ।
यता युएईपनि आजको खेल जित्दै सिरिजको सुखद अन्त्य गर्न चाहन्छ । सिरिजको शुरुवाती दुई खेलमा पपुवा न्युगिनी र नेपाललाई पराजित गरेको युएई शनिबार भएको खेलमा पपुवा न्युगिनीसँग ६ विकेटले पराजित भएको थियो ।
