काठमाडौं, ११ चैत्र । नेपाली काँग्रेसको केन्द्रीय कार्यसमिति बैठक सानेपास्थित केन्द्रीय कार्यालयमा जारी छ । बैठकले आउँदो स्थानीय चुनावका लागि रणनीतिबारे छलफल गरिरहेको छ ।
काँग्रेसको टिकट बाँड्ने निकायबारे समेत बैठकले टुंगो लगाउने बुझिएको छ । महानगरपालिका, उपमहानगरपालिका, नगरपालिका र गाउँपालिकाका प्रमुख, उपप्रमुख, अध्यक्ष र सदस्यहरुको टिकट बाँड्ने जिम्मा दिने निकायबारे टुंगो लगाइने बुझिएको छ ।
यसैगरी, काँग्रेसले संसदीय समित पनि गठन गर्दैछ । संसदीय समिति टिकटको टुंगो लगाउने केन्द्रीय निकाय भएकाले यसको महत्व रहेको छ ।
काँग्रेसले चुनावी तालमेलबारे पनि टुंगो लगाउने भएको छ । सत्ता गठबन्धनका घटक दलसँग काँग्रेसले तालमेल गर्ने सम्भावना रहेको छ ।
