काठमाडौं, १७ चैत्र । रिपोर्टर्स क्लब नेपालद्धारा विभिन्न व्यक्तित्वहरु सम्मानित भएका छन् ।
क्लबले आफ्नो २४औं वार्षिकोत्सवको अवसरमा आज (बिहीबार) काठमाडौंको याक एण्ड यती होटेलमा आयोजित विशेष समारोहका बीच नेपाली समाजको विभिन्न क्षेत्रमा महत्वपुर्ण योगदान गरेका विभिन्न व्यक्तिहरुलाई प्रधानमन्त्री शेरबहादुर देउवाबाट सम्मान गरिएको हो।
डिस होमका प्रवन्ध निर्देशक सुदीप आचार्य प्रधानमन्त्री देउवाबाट सम्मानित भएका हुन्। उनले डिस होममार्फत नेपालको पे टीभी उद्योगमा पुर्याएको योगदानको कदर गर्दै विशेष सम्मान गरिएको हो ।
उनको सम्मान पत्रमा लेखिएको छ,‘विश्व बजारमा प्रचलित लोकप्रिय टेलिभिजन प्रविधि ‘डाइरेक्ट टु होम’ मार्फत नेपाली जनताको मन जित्दै नेपालको पे टीभी उद्योगमा क्रियाशील सबैभन्दा सफल र ठूलो कम्पनी डिसहोम मिडिया नेटवर्कको कुशल नेतृत्व गरेबापत तपाईंलाई रिपोर्टर्स क्लब नेपालको २४ औं वार्षिकोत्सवका अवसरमा विशेष सम्मान गरिएको छ । तपाईंको उत्तरोत्तर प्रगतिको शुभकामना !’
यसरी सम्मानित हुनेमा बोधि टेलिभिजनका समाचार प्रमुख चन्द्र बानियाँ, इन्जिनियर प्रशान्त झा, इन्जिनियर अशोक धमला, समाजसेवी एवम ब्यवसायी हरिशरण सुवेदी, समाजसेवी एवम ब्यवसायी राममणि न्यौपाने, नेपाली रेडियो नेटवर्कका प्रवन्ध निर्देशक अमृत अधिकारी, शिक्षासेवी दिपक पुडासैनी, नेपाल टेलिकम, रिपोर्टर्स क्लब नेपालको झापा शाखा रहेका छन् ।
तस्विर : मुकुन्द कालिकोटे, रिपोर्टर्स नेपाल डटकम
