काठमाडौं, २१ चैत्र । स्थानीय तहको निर्वाचन नजिकिएसँगै दलहरु चुनावको तयारीमा जुटेका छन् ।
सत्तापक्षीय गठबन्धनले भने चुनावमा तालमेलको गृहकार्य थालिसकेका छन् ।
कतिपय जिल्लामा त गठबन्धनमा आवद्ध दलहरुले चुनावी तालमेल गरिसकेका छन् ।
तर, डा. शेखर कोइराला र महामन्त्री गगनकुमार थापाले भने कुनैपनि हालतमा गठबन्धन गर्न नदिने अडान लिएका छन् ।
उनीहरुले आफ्नो समूहको छुट्टै भेला गरिरहेका छन् ।
कांग्रेस एक्लै चुनावमा जानुपर्ने उनीहरुको अडान छ।
सार्वजनिक रुपमै शेखर कोइरालाले गठबन्धन गर्न नहुने र गठबन्धन गरे कांग्रेसको हालत भारतको कंग्रेस आईको जस्तै हुने भनिरहेका छन् ।
प्रधानमन्त्री एवम् सभापति शेरबहादुर देउवाले भने गठबन्धन गरेर जानुपर्ने मत राखिरहेका छन् ।
अहिले कांग्रेसमा बहुमत सदस्यहरु चुनावी तालमेलकै पक्षमा छन् ।
गठबन्धनमा आवद्ध दलका नेताहरुको मन बिझाउनेगरि कुनैपनि अभिव्यक्ति नदिन सभापति देउवाले कडा चेतावनी दिएका छन् ।
पछिल्लो समय नेता शेखर कोइराला र गगन थापाको समूहले भने गठबन्धन गर्न नहुने भन्दै सोहीअनुसारको तयारी गरेका छन् ।
उनीहरु अन्तिमसम्म पनि चुनावी गठबन्धन गर्न नदिनेगरि जुटेका छन् ।
कांग्रेस वरिष्ठ नेता रामचन्द्र पौडेलले समेत गठबन्धन गरेर जाँदा नै कांग्रेसलाई फाईदा हुने धारणा राख्दै आएका छन् ।
उनले स्थानीय तहको आवश्यकत्ताअनुसार नै चुनावी तालमेल गर्नुपर्ने बताएका छन् ।
