काठमाडौं, ३० चैत्र । काठमाडौं महानगरपालिकाको मेयरमा नेपाली काँग्रेसबाट सृजना सिंह मुख्य दाबेदार देखिएकी छिन् । सिंहले निकटस्थहरुसँग मेयरमा चुनाव लड्नेबारे छलफल गरेको बुझिएको छ ।
काँग्रेस पूर्वमहामन्त्री प्रकाशमान सिंहकी पत्नी सृजना सिंहले उम्मेदवार बन्ने सक्रियता बढाएकी छिन् । उनी वडाहरुमा दैनिक पुगिरहेको बुझिएको छ ।
सृजना सिंह काँग्रेसको राजनीतिमा विद्यार्थीकाल देखि नै सक्रिय छिन् । उनको जन्मथलो गोरखा जिल्ला हो ।
नेपाली काँग्रेसभित्र नेताका परिवारका सदस्यहरु धमाधम चुनावी मैदानमा देखिइरहँदा सृजना सिंह पनि अगाडि बढ्न लागेकी हुन् । सभापति शेरबहादुर देउवाकी पत्नी आरजु देउवा प्रतिनिधि सभाको चुनाव लडिसकेकी छिन् । उनी फेरि चुनाव लड्ने तयारीमा छिन् ।
