काठमाडौं, ३ वैशाख । रुसले अमेरिकासहित उसका निकट देशहरुलाइ अविश्वसनीय परिणाम आउनसक्ने चेतावनी दिएको छ । युक्रेनलाई हतियार आपूर्ति गरिरहेको भन्दै रुसले त्यस्तो चेतावनी दिएको हो । रुसको उक्त चेतावनीसँगै आणविक युद्धको खतरा औल्याइएको छ ।
युक्रेनी राष्ट्रपति भोलोडिमिर जेलेन्स्कीले शुक्रबार सीएनएनसँगको अन्तवार्तामा रुसी राष्ट्रपति भ्लादिमिर पुटिनले आणविक हतियारको प्रयोग गर्न सक्ने बताएका छन् । पुटिनले मानिसको जीवनको कुनै मूल्य नगर्ने भन्दै आणविक या रसायनिक हतियार प्रयोग गर्नसक्ने खतरा बताए ।
युक्रेनले रुसको सैनिक जहाज मिसाइल हमलाबाट डुबाइदिएपछि नयाँ घटना विकास भएको छ । रुसले युक्रेनको मिसाइल उत्पादन गर्ने प्लान्ट नै ध्वस्त पारिदिएको छ । अमेरिका, नाटो देशका अलावा कतिपय देशहरुले युक्रेनलाई हतियार पठाएपछि रुसले कठोर नीति लिन थालेको छ । पूर्वी र दक्षिणी युक्रेनमा रुसी हमला केन्द्रित भएको छ ।
यसैगरी, ९ मे मा रुसले युक्रेनमाथि जितको घोषणा गर्ने तयारी गरेको खबरहरु आउन थालेको छ । ९ मे कै दिन रुसले हिटलको नाजी जर्मनी सेनामाथि जितको घोषणा गरेको थियो । यो खबरसँगै पुटिनले आणविक हतियारको प्रयोग गर्ने चर्चा चलेको छ । आणविक हतियारको रणनीतिक प्रयोग गर्न लागेको आशंका जेलेन्स्कीले पनि खुलाएका छन् । योसँगै सँसारमा आणविक हतियारको प्रयोगको खतरा बढेको छ । एजेन्सीको सहयोगमा
