एजेन्सी, १३ बैशाख । भारतीय क्रिकेटर सचिन तेन्दुलकरकी छोरी साराले छिट्टै बलिउडमा डेब्यु गर्दैछिन् । एक मिडिया रिपोर्टका अनुसार सारा फिल्ममा धेरै चासो राख्छिन् र ग्लैमर संसारमा आफ्नो करियर बनाउन चाहन्छिन्। हाल, उनी एक पेशेवर मोडेल हुन् र अभिनय सीप पनि सिकेकी छिन्।
साराले युनिभर्सिटी अफ लण्डनबाट मेडिसिन पढेकी छिन् । यसअघि उनले धिरुभाई अम्बानी इन्टरनेशनल स्कुलमा अध्ययन गरेकी थिइन् । उनी २४ वर्षकी भइन् । बलिउड अभिनेता कार्तिक आर्यन, रणवीर सिंह, सारा अली खान, आलिया भट्ट र अन्य धेरै सेलिब्रेटीहरू सहित सारा तेन्दुलकरको इन्स्टाग्राम खातामा १९ लाख भन्दा बढी फलोअरहरू छन्। साराले प्रायः आफ्नो ग्लैमरस तस्विर, भिडियो यहाँ शेयर गर्छिन्।
स्रोतका अनुसार सारा खासै हेडलाइनमा रहँदैनन्, त्यसैले उनको अभिनय कौशलबारे मानिसहरूलाई अझै थाहा छैन। उनी धेरै प्रतिभाशाली छिन् । साराका आमाबाबुले पनि उनको निर्णयमा समर्थन गर्छन् र छोरीको अभिनेत्री बन्ने निर्णयमा उनीहरूलाई कुनै आपत्ति छैन।
केही वर्षअघि पनि साराले बलिउड अभिनेता शाहिद कपूरसँग डेब्यु गर्ने खबर आएको थियो । तर, त्यसबेला सचिन तेन्दुलकरले यी खबरलाई खण्डन गर्दै साराले अहिले आफ्नो पढाइमा ध्यान केन्द्रित गरिरहेको बताएका थिए ।
साराको नाम भारतीय क्रिकेटर शुभमन गिलसँग जोडिएको छ । केही समयदेखि यी दुवै एकअर्कालाई डेटमा रहेको खबर आएको थियो । यो कुरा त्यतिबेला बाहिर आएको थियो जब सारा र शुभमन दुबैले आफ्नो तस्विरमा एउटै क्याप्सन राखेका थिए ।
