काठमाडौं, जेठ १५ । युइएफए च्याम्पियन्स लिगको उपाधि स्पेनिस क्लब रियल म्याड्रिडले जितेको छ । पेरिसमा शनिबार राति भएको यस सिजनको फाइनलमा इङ्लिस क्लब लिभरपुललाई १–० गोलले हराउँदै रियल च्याम्पियन बनेको हो ।
रियल १४औं कीर्तिमानी उपाधि जित्न सफल भयो । रियलको जितमा ब्राजेली स्टार भिनिसियस जुनियर नायक बने । भिनिसियसले ५९औं मिनेटमा फेडे भाल्भर्डेको पासमा गरेको गोल निर्णायक बनेको थियो ।
प्रतिस्पर्धात्मक खेलमा लिभरपुलले पहिलो हाफमा गोलको राम्रा अवसर खेर फालेको थियो । मोहमद सलाह र साडियो मानेको प्रहारमा रियलका गोलरक्षक थिवाउट कोर्टुवा बाधक बनेका थिए । पहिलो हाफमा रियलका कप्तान करिम बेन्जेमा पनि चुकेका थिए।
दोस्रो हाफमा आक्रामक देखिएको रियलले एउटै गोलमा बाजी मार्न सफल भयो । सर्वाधिक १४ औं पटक च्याम्पियन्स लिग उपाधि जितेको रियल यसअघि सन् २०१८ मा च्याम्पियन भएको थियो । रियलले त्यतिवेला फाइनलमा लिभरपुललाई नै ३–१ गोलले हराएको थियो । जसको बदला लिन लिभरपुलले सकेन । एजेन्सी
