काठमाडौं, १८ जेठ । राप्रपाका निवर्तमान अध्यक्ष तथा पूर्व अर्थमन्त्री डा. प्रकाशचन्द्र लोहनीले सरकारले अहिले ल्याएको बजेटमा हावादारी गफ रहेको आरोप लगाएका छन् । उनले नेपालको बजेटमा देखिएको विकृति अहिलेको बजेटमा पनि देखिएको सुनाए । हिजो राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् ।
सरकारले जनतालाई मुर्ख बनाउने काम गरेको पनि उनको आरोप छ । उनले सरकारले किसानलाई पेन्सन दिने भनेर घोषणा गरेको तर मलको व्यवस्था नगरेको गुनाो पोखे । उनले भने,‘सरकारले धान आयात घटाउँछु भनेको छ, यसको लागि नेपालमै धान उत्पादन बढाउनुपर्यो नि, अनि धान उत्पादन बढाउन त मलको व्यवस्था गर्नुपर्छ । तर, मलको व्यवस्था नगर्ने अनि यस्तो हावादारी गफ गर्ने, यो भनेको गँजेडीको गफ हो ।’ उनले नेपाल सरकार र राष्ट्र बैंक एउटै लिकमा नरहेको स्पष्ट पारे ।
