काठमाडौं, १ जेठ । खानेपानी मन्त्रालयले मेलम्ची खानेपानी हेडवक्र्सको मर्मत गरि दिगो रुपमा पानी आपूर्ति गर्ने सम्बन्धमा अध्ययन भइरहेको जनाएको छ । बुधबार सिंहदरबारमा पत्रकार सम्मेलन गर्दै खानेपानी मन्त्री उमाकान्त चौधरीले यस बर्ष बर्षालाई मध्यनजर गर्दै मेलम्ची खानेपानीको मुखढोका बन्द गरिएको भन्दै यसको दिर्घकालीन समाधानका बारेमा अध्ययन भइरहको जानकारी दिए ।
मन्त्री चौधरीले हेडवक्र्सको मर्मत गरि दिगो रुपमा पानी आपूर्ति गर्ने सम्बन्धमा हाल एसियाली विकास बैंकको सहयोगमा तयार भइरहेको अध्ययन प्रतिवेदनको आधारमा कार्ययोजना बनाई बर्षायाम सकिने बितिकै कार्यान्वयन गर्ने बताए ।
उनले बर्षायाममा आउन सक्ने सम्भावित बाढी तथा पहिरोबाट अरवौंको लगानीमा निर्माण भएको मेलम्ची खानेपानी आयोजनाका संरचनाहरुलाई सुरक्षित गर्न अति आवश्यक भएकाले मेलम्चीको पानी हाललाई बन्द गरिएको जानकारी दिए । यसबाट पर्न जाने असुविधा प्रति क्षमा माग्दै मन्त्री चौधरीले उपत्यकामा खानेपानी अभाव हुन नदिन बागमति नदिबाट ४ करोड लिटर आपूर्ति गरिदै आएकोमा थप ६ करोड लिटर पानी पनि बागमतिबाटै र अपुग ७ करोड लिटर पानी स्थानीय सतहबाट जम्मा गरि बितरण गरिने धारणा राखे ।
काठमाडौं उपत्यकाको खानेपानी समस्याको दिगो समाधानका लािग यांग्री, लार्के, सिस्नेरी महादेव खोला लगाएतका सम्भाव्य सवै श्रोतहरुबाट पानी उपलव्ध गराउनका लागि कार्यक्रमहरु क्रमश कार्यान्वयन गरिने मन्त्री चौधरीले बताए । गत वर्षको १ असारमा आएको बाढीका कारण मेलम्चीको मुहानमा क्षति पुगेको थियो । मर्मत सम्भार गरेर गत ११ वैशाखबाट पानी सुरूङमार्गमा पठाइएको थियो ।
तस्विर : मुकुन्द कालिकोटे/रिपोर्टर्स नेपाल डटकम
