काठमाडौं, ३१ असार । लोकतान्त्रिक समाजवादी पार्टी (लोसपा) नेता अनिलकुमार झाले जनता समाजवादी पार्टीका अध्यक्ष उपेन्द्र यादव आफ्नो हाराहारीको व्यक्तित्वलाई पार्टीमा देखिनसहने नेता भएको आरोप लगाएका छन् ।
नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै झाले भने, “उपेन्द्रजी आफ्नो हाराहारीको व्यक्तित्वलाई पार्टीमा देखिसहनुहुन्न । त्यसैले उहाँको प्रतिस्पर्धी अटाउन गाह्रो छ । हामीले जसपामा हुँदै उपेन्द्रजीबाहेकको राजनीति अघि बढाउनुपर्ने कुरा साथीहरुलाई पटकपटक राखेका थियौं । त्यस बेला उहाँहरुले बेवास्ता गर्नुभयो । अहिले बाबुराम भट्टराईदेखि रेणु यादवसम्मले त्यो कुरा महसुस गरिरहनुभएको छ भने लोसपामा स्वागत गछौं ।”
आगामी संघ र प्रदेशको निर्वाचनमा जसपा कमजोर हुने र लोसपाको शक्ति पुनः आर्जन हुने पनि नेता झाले दाबी गरे । उनले थपे, “स्थानीय तहमा जसपाको लोसपाभन्दा धेरै सिट आयो । किनभने पार्टी विभाजनमा हाम्रा कतिपय साथी उतै रहनुभयो । त्यो समयक्रममा रिकभर हुन्छ ।” उनले लोसपालाई आफ्नै बलबुतामा चलाउने सबै काम छाडेर गठबन्धन भन्दै अहोरात्र नलाग्ने जिकिर पनि गरे ।
लोसपा नेता झाले देशका कतिपय नेताहरुले मधेसीलाई करदाता र मतदाता मात्र ठानिरहेको आरोप पनि लगाए । उनले भने, “कतिपय नेताहरु नागरिकताको विषय आउनासाथ त्यो मधेसीको मात्र मुद्दा हो भन्ने ठान्छन् । मधेसीलाई नागरिक मान्दैनन् । करदाता र मतदाता मात्र ठान्छन् । नागरिकता बाँड्दा मधेसीले मात्र लाभ लिन्छन् भन्ने डर मानेर विरोध गर्छन् । अहिलेको विधेयकले त मधेसीले भन्दा अरुले लाभ लिन्छन् ।”
नेकपा एमालेका नेता भीम रावलले त नागरिकता विधेयकको विरोध गरिरहनुभएको छ नि भन्ने प्रश्नमा झाले भने, “भीम रावलको राष्ट्रवादबारे मेरो कुनै टिकाटिप्पणी छैन । तर उहाँको पुख्र्यौली थलो रावलपिण्डी हो । त्यो रावलपिण्डी पाकिस्तानमा पर्छ । मेरो घरमा बुहारी आइसकेकी छन् । हामीले बुहारीलाई विश्वास गर्नुपर्छ । उनीहरु ससुरालीप्रति नै समर्पित हुन्छन् । उनीहरुबाटै वंश चल्छ । उनीहरुको अपमान नगरौं । गँजडीहरुले मात्र बुहारीहरुलाई रअ, सीआईए, केजीबीको एजेन्ट देख्छन् । बुहारीहरुले माइती देशका लागि जासुसी गर्दैनन् । चन्द्र सूर्य रहुन्जेल नेपाल रहन्छ । देश बेच्ने काम बुहारीहरुले होइन ठूलाबडाले नै गर्छन् ।”
भारतीय चेलीले डोलीभित्र बम बारुद लिएर नआउने पनि उनले बताए । झाले भने, “मेरी हजुरआमा मैथिलीभाषी भारतीय चेली हुनुहुन्थ्यो । तर उहाँले माइती देशको भाषा बिर्सनुभएको थियो । छोरीचेलीले डोलीभित्र बम बारुद होइन, माया, स्नेह र ममता लिएर आउँछन् । राजा त्रिभुवनले भारतमा बिहे गर्नुभयो । महारानीले नेपाललाई माइती देशमा मिसाउनु त भएन नि ?”
अर्को प्रसंगमा लोसपा नेता झाले नेकपा (माओवादी केन्द्र) का अध्यक्ष पुष्पकमल दाहाल प्रचण्ड भारतको भ्रमणमा जानु सकारात्मक भएको टिप्पणी गरे । उनले भने, “भारतमा चार धाम छन्, गंगा, जमुना, सरस्वती छन् । प्रचण्डलाई भारत जाने छुट छ । संस्कृतका किताबमा आगो बाल्ने प्रचण्ड भारतीय जनता पार्टीको निम्तोमा जानु राम्रो कुरा हो । उहाँ युटर्न लिन सक्ने, क्रमभंग, छलाङ लगाउन सक्ने नेता हो । भारतसित सम्बन्ध विस्तारमा लाग्नु राम्रै कुरा हो ।”
