एजेन्सी, ३ भदौ । बलिउड अभिनेत्री जिया खान आत्महत्या प्रकरण फेरि चर्चामा आएको छ । वास्तवमा, उनकी आमा राबिया खान आफ्नो बयान रेकर्ड गर्न बिहीबार विशेष अदालत पुगेकी थिइन्। उनले अभिनेता सुरज पंचोलीमाथि अदालतमा गम्भीर आरोप लगाएको भारतीय समाचार एजेन्सी दैनिक भाष्करले जनाएको छ । उनले यो हत्या नै भएको बताइन् । उनले भनिन्,‘मेरी छोरी जियाले आत्महत्या गरेको भन्ने कुनै प्रमाण न प्रहरी न सीबीआईले फेला पारे।’
अदालतमा विशेष न्यायाधीश एएस सय्यदको अगाडि राबियाले भनिन्,‘जिया खानको मुद्दा आत्महत्याको होइन, हत्याको हो। ३ जुन २०१३ मा जिया सुत्ने कोठा खोल्ने बित्तिकै उनी दुपट्टामा झुण्डिएको अवस्थामा फेला परिन् । लगत्तै मैले अभिनेत्री अन्जु महेन्द्रुलाई फोन गरेर जियाको बारेमा भनें । उनी तुरुन्तै मोइन बेगसँग घर पुगिन् र हामीले जियाको घाँटीमा फाँसी खोलिदियौं। हामीले जियाको सास फर्कने प्रयास गर्न थाल्यौं, मैले सामान्य सीपीआर दिन थालें। मोइन दौडेर डाक्टरकहाँ पुगे र जियालाई मृत घोषणा गरे ।’
जियाले जुन ३, २०१३ मा आफ्नो जुहू अपार्टमेन्टमा झुण्डिएर आत्महत्या गरेकी थिइन् । उनको मृत्यु भएको केही दिनपछि जियाका प्रेमी सूरज पञ्चोलीको नाममा उनको घरबाट ६ पृष्ठको सुसाइड नोट फेला परेको थियो । उक्त नोटले सुरजसँग जियाको बिग्रँदै गएको सम्बन्धका कारण नर्भस ब्रेकडाउनलगायत धेरै खुलासा गरेको थियो। त्यसपछि उनकी आमाले सुरजविरुद्ध मुद्दा दायर गर्दै सुरजले जियालाई आत्महत्या गर्न बाध्य पारेको आरोप लगाएकी थिइन् । यस विषयमा सीबीआईले अनुसन्धान गरिरहेको छ । सुरज अहिले धरौटीमा छुटेका छन् ।
