काठमाडौं, १० भदौ । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ धरान उपमहानगरपालिकाका मेयर हर्क साम्पाङको निम्तो मान्न धरान पुगेका छन् । सो क्रममा उनले वृक्षारोपण पनि गरेका थिए ।
दाहाल धरान उपमहानगरको आयोजना र वरिष्ठ कलाकार जेवि टुहुरेको स्मृतिमा आयोजित वृक्षारोपण कार्यक्रममा सहभागी भएका थिए । यसअघि उपमहानगरपालिकाको कामविशेषले मेयर साम्पाङ काठमाडौं आउँदा उनले दाहालसँग भेटवार्ता गरेका थिए ।
उनले काठमाडौं बसाईको क्रममा विभागीय मन्त्रीहरुबाहेक अरु नेताहरुसँग भेटघाटको कार्यक्रम नभएको बताएका थिए । तर, बसाईको क्रममा उनले दाहालसँग उनकै निवास खुमलटार पुगेर भेटवार्ता गरेका थिए ।
