काठमाडौं, कात्तिक १। आ–आफ्ना खर्कबाट पानीघाटमा जाँदा भेटिएका चौंरीजस्तै केही वर्षअघिसम्म केन्द्रीय समिति र एउटै कार्यक्रममा भेटिन्थे रामचन्द्र पौडेल र गोविन्दराज जोशी ।
नेपाली कांग्रेसका बैठक तथा कार्यक्रमका साथै तनहुँमा एकैसाथ देखिँदा केही वर्षअघिसम्म बोलेजस्तो गरे पनि उनीहरूमा आत्मीय सम्बन्ध भने थिएन । भेटिएका बखत छिनभरमै उनीहरू दुवै आआफ्ना बाटो लाग्थे ।
बाहिर एउटै पार्टीका नेता भए पनि दुवैको व्यवहार र सम्बन्ध प्रतिस्पर्धी दलको जस्तै थियो । समसामयिक राजनीतिलाई हेर्ने आँखा र अडान राजनीति सुरु गर्दादेखि नै भिन्नै थियो उनीहरूको । जिल्ला र केन्द्रको राजनीतिमा पौडेल र जोशीले आआफ्नो गुट र शक्ति संघर्ष पहिलेदेखि नै चलाउँदै आएका छन् ।
२००१ असोज ३० गते तनहुँको रिस्ती–२ बाहुन पोखरामा जन्मिएका पौडेल र २००६ साउन २८ गते तनहुँकै रूपाकोट–३ खोल्टेमा जन्मिएका जोशीलाई पञ्चायतविरुद्ध आन्दोलनमा होमिएको भनेर कांग्रेसले एकै ठाउँमा उभ्यायो ।
सामान्य परिवारका पौडेलले र राणा शासनकै बेलामा काठमाडौंसँग सम्पर्कमा रहेका जोशीले राजनीति भने फरक ढंगबाट सुरु गरे । पौडेलको भने राजधानीसँग खासै सम्पर्क थिएन । पौडेलले संस्कृत पढे भने जोशीले शिक्षा र कानुनको अध्ययन गरे । नागरिक दैनिकबाट
