काठमाडौं, ४ कार्तिक । प्रधानमन्त्री एवम् नेपाली कांग्रेसका सभापति शेरबहादुर देउवाले गठबन्धन बनाउनु समयको आवश्यकत्ता भएको भन्दै आगामी निर्वाचनमा गठबन्धनलाई अत्यधिक बहुमतले जिताउन आग्रह गरेका छन् ।
आज (शुक्रबार) गठबन्धनको गण्डकी प्रदेशस्तरीय कार्यकर्ता भेलालाई सम्बोधन गर्दै देउवाले यस्तो बताएका हुन् । उनले गठबन्धन बलियो भएमात्रै देश सही दिशामा अघि बढ्ने बताए । गठबन्धनलाई सरकारको नेतृत्वमा पुर्याउनेगरि विजयी गराउन उनले गठबन्धनमा आवद्ध सबै दलका नेता तथा कार्यकर्ताहरुलाई सोहीअनुसारको भूमिका खेल्न निर्देशन दिए ।
उनले भने,‘पाँच दलीय गठबन्धनलाई स्थानीयस्तरबाटै बलियो बनाउनुहोस, केन्द्रमा हाम्रो राम्रो सम्बन्ध छ । तलपनि त्यस्तै राम्रो सम्बन्ध बनाउनुहोस । तपाईँहरु पनि यहाँ मिल्नुहोला नमिले अरुले जित्ला ।’
देउवाले चुनावमा अवसर नपाएकारुले गठबन्धनले जितेर सरकार बनाएपछि अवसर पाउने विश्वास दिलाए । पछिल्लो समय गठबन्धनका शीर्ष नेताहरुले संयुक्त कार्यक्रमको आयोजना गरेर नेता तथा कार्यकर्ताहरुलाई प्रशिक्षण दिइरहेका छन् । देउवा आजै पोखराबाट बुटवल आउने कार्यक्रम छ ।
