काठमाडौँ,६ पुष । जिल्लाको पाचँपोखरी थाङपाल गाउँपालिका–४ मा अवस्थित सुन्दर नागीथाम डाडाँ अहिले पर्यटकीय गन्तव्यका बनेको छ । बाह्रैमास फरफराइ रहेको लुङदार र पञ्चरङ्गी तोरणले नागीथाम डाडाँको शोभा बढाएको हो ।
सिन्धुपाल्चोक जिल्लाको पाँचपोखरी थाङ्पाल गाउँपालिकाले पेमाछल उद्यान केन्द्रको रुपमा विकास गर्दै लगेको छ । अहिले गाउँपालिकाले प्रारम्भिक चरणमा ध्यान केन्द्र, तारा महल र अष्टमणिको चैत्य निर्माणकार्य सम्पन्न गरेको छ । गत महिना त्यहाँ निर्माण गरिएको तारा महल र अष्टमणि चैत्यको उद्घाटन गरिएको छ ।
यस क्षेत्रको विकास गर्न योजना सहित काम भइरहेको गाउँपालिका अध्यक्ष टासी लामाले बताए । उक्त स्थानमा बौद्ध शिक्षासम्बन्धी अध्यापनको अवधारणा पनि रहेको अध्यक्ष लामाले बताए । यस अवधारणालाई मूर्तरुप दिन देश तथा विदेशमा रहेका नेपाली र अन्तर्राष्ट्रिय संस्थासँग सहयोग र समन्वयका लागि लामाले अपिल गरेका छन् ।
साहसिक खेल प्याराग्लाइडिङको पनि सफल परीक्षण भइसकेको नागीडाँडामा अन्य थुप्रै सम्भावना छन् । यो स्थान समुद्री सतहदेखि दुई हजार चार सय ८० मिटर उचाइमा रहेको छ । यहाँबाट पश्चिममा जुगल हिमशृङ्खलाको मनमोहक दृश्यको अवलोकन गर्न र थाङ्पाल उपत्यका सुन्दर गाउँ रहेको छ । मुख्यतः यहाँ जाडोयाममा पर्ने हिउँसँग रमाउनका लागि आन्तरिक तथा बाह्य पर्यटक आउने गरेका छन् । पर्यटकलाई मनोरञ्जन र खर्च गर्नका लागि अन्य संरचनाको साथै पर्याप्त होटल र होमस्टेको सुविधा आवश्यक रहेको स्थानीय बताउँछन् ।
मणि ब्राह्मणको परिचय जीवनगाथासँगै यस ठाउँको परिचय धारणी सूत्र (मन्त्र)मा उल्लेख गरिएको पाइन्छ । यस मन्त्रमा उल्लेख गरेअनुसार दायाँपट्टि सिंह गर्जेको जस्तो बायाँपट्टि हात्ती सुतेको जस्तो र बीचमा शिखर कैलाश रहेको र त्यस स्थानमा पवित्र भूमि समय ताराको बासस्थान हुनेछ भनी उल्लेख गरेको नागीथाम डाँडा संरक्षण समितिका अध्यक्ष फुर्पा सिङ्गी लामाले बताए ।
तिब्बतको तान्त्रिक यान तोप्तेन शाक्य श्रीको भतिजा स्वयम्बु दर्शन गर्ने क्रममा यही स्थल हुँदै गएको आलेखहरू भेटिएको लामाले बताए । शाक्य श्री यात्रामा खोलाको तीरैतीर जाने क्रममा धुपी पिन्ने घट्ट रहेको र त्यसैमाथि एउटा पवित्रस्थल देखिएकाले त्यस स्थानमा मणि ब्राह्मणको सम्झनामा एउटा चैत्य निर्माण गरेको पनि देख्न सकिने किंवदन्ती छ । यस स्थानमा पाँचवटा डाकिनी (समय तारा)को बासस्थान रहेको भोट भाषामा लेखिएको पाइन्छ । यस कारण अहिले निर्माण भएको तारा महलमा समय तारा (२१ तारा) राखेको लामाले बताए । यस तारा महलमा दर्शन गर्ने र पूजास्थल हुनेछ भने बाँकी भवनमा बौद्धमार्गीहरू ध्यान गर्ने केन्द्रका रूपमा प्रयोग हुनेछ । रासस
