काठमाडौँ,२६ पुष । प्रदेश नं १ का मुख्यमन्त्री हिक्मतकुमार कार्कीले प्रदेशमा सुशासनका निम्ति भ्रष्टाचारमा शून्य सहनशीलता अपनाउने बताएका छन्। प्रदेशसभाको प्रथम अधिवेशनको आज बसेको दोस्रो बैठकलाई सम्बोधन गर्दै उहाँले प्रदेश सरकारले पर्यटन र कृषि क्षेत्रलाई उच्च प्राथमिकतामा राख्ने बताए ।
उनले आयातलाई निरुत्साहित गर्न कृषिमा व्यवसायीकरण गरी प्रशस्त रोजगारी सिर्जना गर्ने उल्लेख गर्दै प्रदेश सरकारले प्रदान गर्ने सेवा चुस्त एवं दुरुस्त हुने कुरामा जोड दिए । उनले शिक्षा र स्वास्थ्य जस्ता जनताका आधारभूत आवश्यकता आगाडि बढाउने जनाउँदै सरकारले प्रदेश संरचना निर्माणमा पनि विशेष ध्यान दिने बताए ।
उनले दलहरुबीच सहकार्य र एकता गरी अघि बढ्ने प्रतिबद्धता जनाउँदै प्रदेश सरकाले अनुभव र ज्ञानलाई पूर्ण प्रयोग एवं उपभोग गरी प्रदेशलाई व्यवस्थित बनाउँदै लैजाने धारणा राखे । मुख्यमन्त्री कार्कीले प्रदेशको नाम राजनीतिक दलहरुकै सहमति र सहकार्यबाट टुङ्गो लगाउने उल्लेख गर्दै प्रदेशको आर्थिक र सामाजिक रुपान्तरणका लागि सरकार गम्भीर रहेको बताए ।
नेपाली कांग्रेस संसदीय दलका नेता उद्धव थापाले सरकारले प्रदेशको अवस्था बुझेर जनताको जीवनस्तर उकास्ने योजना ल्याउनुपर्नेमा जोड दिए । नेकपा (माओवादी केन्द्र) संसदीय दलका नेता इन्द्रबहादुर आङ्बोले प्रदेशको औचित्य सावित गर्न प्रदेश सरकारले समृद्धि र सुशासनको क्षेत्रमा काम गर्नुपर्ने बताए ।
नेकपा (एमाले)का तर्फबाट रामबहादुर मगरले प्रदेशको नामकरण गर्नु अत्यन्त आवश्यक रहेको उल्लेख गर्दै सङ्घीय सरकारले कतिपय कानुन निर्माण गर्न नसक्दा प्रदेश सरकारलाई समस्या भएको बताए ।
जनता समाजवादी पार्टीका संसदीय दलका नेता निर्मला लिम्बूले प्रदेश सरकार जनताप्रति पूर्णरुपमा उत्तरदायी हुनुपर्ने जनाउँदै सङ्घीयता र लोकतन्त्रलाई बलियो बनाउन संविधानमा संशोधन हुनुपर्ने माग राखे ।
बैठकको प्रारम्भमा प्रदेशसभाका ज्येष्ठ सदस्य एवं सभाध्यक्ष गयानन्द मण्डल गनगाइँले प्रदेश प्रमुखको कार्यालयबाट प्राप्त मुख्यमन्त्री तथा मन्त्रिपरिषद्को गठनसम्बन्धी पत्र पढेर सुनाए । उनले प्रदेशसभा नियमावली, २०७४(पहिलो संशोधन समेत) को नियम ७ बमोजिम सभामुख पदको निर्वाचन यही पुस २८ गते बिहान ११ बजे हुने मिति घोषणा गरे। रासस
