पोखरा, फागुन २१। हावाहुरीका कारण फेवातालमा शनिबार डुंगा पल्टिँदा बेहोस भएकी वृद्धाको मृत्यु भएको छ ।मृत्यु हुनेमा पोखरा–१, बगरका ७० वर्षीया यममाया गिरी रहेकी छन् । उनको उपचार क्रममा गण्डकी मेडिकल कलेजमा मृत्यु भएको हो ।
६ जना सवार डुंगा शनिबार दिउँसो ४ बजेर १० मिनेटमा पल्टिएको थियो । मन्दिरबीच रहेको तालबाराही मन्दिर दक्षिणी भेगमा डुंगा पल्टिएपछि रेस्क्यु टोलीले अन्य ५ जनाको सकुशल उद्धार गरेको थियो । उनीहरूको अवस्था सामान्य छ ।
बेहोस अवस्थामा उद्धार गरिएकी वृद्धालाई उपचारार्थ अस्पताल लगिए पनि उनको साढे ५ बजे चिकित्सकले मृत घोषित गरेको जिल्ला प्रहरी कार्यालय कास्कीका प्रवक्ता प्रहरी नायव उपरीक्षक श्रवण बिकले जानकारी दिए ।
हावाहुरीका बेला फेवातालमा डुंगा सयर गर्नु जोखिम मानिन्छ । विगतमा डुंगा पल्टिदा दर्जनौंले ज्यान गुमाइसकेका छन् । डुंगा चढ्न लाइफ ज्याकेट व्यवस्था हुने गरेपछि भने डुंगा पल्टिहाले मानवीय क्षति टर्ने गरेको छ ।
