काठमाडौं, ५ चैत्र । माधव नेपालले पार्टीबाट सरकारमा सहभागी हुने मन्त्रीहरुको नाम फाइनल गर्न पार्टीको सचिवालय बैठक बोलाएका छन् । प्रधानमन्त्री पुष्पकमल दाहालले मन्त्रिपरिषद्लाई पूर्णता दिनेगरि छलफल थालेसँगै नेपालले आफ्नो दलबाट सरकारमा सहभागी हुनेहरुको नाम टुँगो लगाउने भएका छन् । त्यसको लागि भोलि (सोमबार) उनले सचिवालय बैठक बोलाएका छन् ।
नेकपा (एकीकृत समाजवादी) ले प्रचण्ड नेतृत्वको सरकारमा तीन मन्त्रालय दाबी गरेको छ । तर, प्रधानमन्त्री प्रचण्डले भने दुई मन्त्रालय र एक राज्यमन्त्री मात्रै दिन सकिने वचन दिएका छन् । त्यसमा पनि एकीकृत समाजवादीले गृहमन्त्रालयमा दाबी गरेको छ। प्रधानमन्त्री दाहाल माधव नेपालको दललाई सम्मानजनक मन्त्रालय दिन तयार रहेको बालुवाटारको दाबी छ ।
एकीकृत समाजवादीमा १० जना सांसद छन् । अध्यक्ष नेपालबाहेक सबै सांसद मन्त्री बन्ने दौडमा छन् । तर, यसपटक नेपालले राजेन्द्र पाण्डे र प्रकाश ज्वालामध्ये एक जनालाई नेतृत्व गरेर सरकारमा पठाउने तयारी गरेका छन् ।
पाण्डेले पनि यसअघि उपराष्ट्रपतिको निर्वाचनको दिन (चैत्र ३) गते आफ्नो दलले एक नम्बरको मन्त्रालय पाउने दाबी गरेका थिए । एकीकृत समाजवादीबाट प्रेम आले, कृष्णकुमार श्रेष्ठ, धनबहादुर बुढालगायत मन्त्री बन्ने दौडमा छन् । अध्यक्ष नेपालले भोलिको सचिवालय बैठकमार्फत मन्त्री बन्नेहरुको नाम तय गर्नेछन् । file photo/ReportersNepal
