काठमाडौं, २२ चैत । नेकपा (माओवादी केन्द्र) का नेता एवं राष्ट्रिय सभाका सांसद नारायणप्रसाद दाहालले चितवन २ मा गठबन्धनका उम्मेदवारको विजय सुनिश्चित भएको बताएका छन् ।
‘चितवन २ मा पहिले रवि लामिछाने नेपालको राजनीतिमा नयाँ दुलही भएर घर भित्रिएको जस्तो थियो । अहिले दुलही भएर आएकै घरमा क्रेज छैन । एमालेका उम्मेदवार रामप्रसाद न्यौपाने आफूलाई माडीको भन्ने गर्छन् । अरुलाई टुरिस्ट उम्मेदवार भन्ने गरेकाले उहाँलाई अहिले अप्ठ्यारो परेको छ । हाम्रो गठबन्धनको उम्मेदवार जितनारायण श्रेष्ठ हो । सबैभन्दा बढी मत गठबन्धनको उम्मेदवारकै आउँछ,’ नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग संवाद गर्दै दाहालले भने ।
रवि लामिछाने सिसै सिसाको घरमा बसेर अरुको झ्यालमा ढुंगा हान्ने नेता भएको आरोप पनि उनले लगाए । दाहालले थपे, ‘म हार्छु, मलाई भोट नदिए पनि हुन्छ भन्ने उम्मेदवार त को छ र दुनियाँमा ? रविजीले जित्छु भन्नु कुन नौलो कुरा भयो र ? हिजो त्यत्रो मत ल्याएर जितेकै हो । उहाँ सत्ताकेन्द्रित राजनीति गर्नुहुन्छ । उहाँ आफू सिसैसिसाको घरमा बसेर अर्काको झ्यालमा ढुंगा हान्न सुहाउँदैन ‘।
गत निर्वाचनमा दिएको अभिव्यक्तिले केही अप्ठ्यारो परे पनि जितनारायण श्रेष्ठकै जित हुने उनले औंल्याए । दाहालले भने, ‘जितनारायणजी युवा नेता हुनुहुन्छ । उहाँ हिजो पार्टी सभापति हुनुहुन्थ्यो । उहाँका केही सीमा पनि छन् । उहाँका हिजोका केही अभिव्यक्तिले अप्ठ्यारो पारे पनि म जित्ने सम्भावना देख्छु । माओवादी पार्टी केन्द्रले निर्णय गरेपछि प्रतिबद्ध भएर लाग्छ । माओवादीको सबै मत कांग्रेसलाई जान्छ । नेपाली कांग्रेसलाई पनि यसको चेत पस्नुपर्छ ।’
अहिलेको अवस्थामा गठबन्धन अपरिहार्य आवश्यकता भएको उनको टिप्पणी छ । दाहालले भने, ‘सदन र पूर्वमा हिजोका भूतहरु जाग्न खोजेका छन् । स्यालहरु र्याल काढेर बसेका छन् । त्यसैले सकेसम्म गठबन्धन सुदृढ बनाउने कुरा हो । हामी त्यसमा लाग्छौं ।’
