काठमाडौं, २४ चैत्र । नेपाल समाजवादी पार्टीका अध्यक्ष एवम् महिला, बालबालिका तथा ज्येष्ठ नागरिकमन्त्री महिन्द्रराय यादवले प्रधानमन्त्री पुष्पकमल दाहाल सरकारले पूर्णता पाएपछि भारत भ्रमणमा जाने बताएका छन् । उनले सरकार बजेट निर्माणको प्रक्रियामा जुटिसकेकोले यी सबै काम सकिनेबित्तिकै भारत भ्रमणमा जाने बताएका हुन् ।
आज विहान नेपाली रेडियो नेटवर्कबाट प्रसारण भएको नेपाली बहस कार्यक्रममा पत्रकार ऋषि धमलासँग कुरा गर्दै उनले यस्तो बताएका हुन् । उनले प्रधानमन्त्री दाहालको यसपटकको भारत भ्रमणले नेपाल र भारत दुई देशबीच रहेका मुख्य विषयहरु समाधान हुने पनि दाबी गरे । उनले वर्तमान सरकार गठन भएपछि नेपाल र भारतबीचको सम्बन्ध झन मजबुद हुने विश्वास दिलाए ।
उनले नेपाल र भारतबीचको बीचमा सिमा समस्या कुटनीतिक र राजनीतिक पहलबाट समाधान हुने बताए । उनले भारतसँगको नेपालको सिमा समस्या ९८ प्रतिशतले हल भैसकेको दाबी गरे । उनले सिमा समस्या समाधानको लागि दुवै देशले समिति गठन गरेर काम गरेको सुनाए ।
कालापानी र लिम्पियाधुरामा रहेको समस्यापनि अब समाधान हुने उनको दाबी छ । दुई देशका सरकारले सिमा समस्या समाधानबारे छलफल अघि बढाएको उनको भनाई छ । सरकारले आफ्नो नीति तथा कार्यक्रममा पनि सिमा समस्या समाधान गर्ने कुरा उल्लेख गरेको पनि उनको भनाई छ ।
