नेपालगन्ज, जेठ २६ । गर्मी बढेसँगै पश्चिम तराईका जिल्लामा तातो हावा चल्दा जनजीवन प्रभावित बनाएको छ। बिहान ११ बजेदेखि अपराह्न ४ बजेसम्म पश्चिम तराईका नेपालगन्जलगायतका क्षेत्रमा तातो हावा चल्दै आएको छ।
नेपालगन्जमा एक सातादेखि तापक्रम ३९ देखि ४१ दशमलव ६ डिग्री सेल्सियससम्म पुगेको छ। नेपालगन्जको तापक्रम बिहीबार ४१ दशमलब ६ डिग्री सेल्सियस पुग्यो। गर्मीका कारण अघिपछि निकै व्यस्त देखिने सहरका सडक पनि दिउँसो सुनसान हुन थालेका छन्। गर्मीले दैनिक ज्यालामा छाक टार्दै आएका मजदुर सबैभन्दा बढी प्रभावित भएका छन्। अहिले तातो हावा चलेको जल तथा मौसम विज्ञान कार्यालयका मौसमविद् राजीव झाले बताए। ‘केही दिनदेखि तातो हावा चलेको छ। यो लु होइन,’ उनले भने, ‘अझै केही दिनसम्म यस्तै भयो भने लु चल्न सक्छ।’
तराईमा गर्मी बढेसँगै तातो हावा चलेको छ। ‘यसले दिमागका नसा तातेर हिटस्टोक हुन सक्छ, जुन अति नै जोखिमयुक्त हुन्छ,’ कान्ति आरोग्य अस्पतालकी बाल रोग विशेषज्ञ डा। रोमा बोराले भनिन्, ‘यो इमर्जेन्सी कन्डिसन नै हो। यस्तो बेलामा बेहोस भएर मृत्यु नै हुन सक्छ।’ डा। बोराले तातो हावामा बाहिर ननिस्कन आग्रह गरिन्। यस्तो बेला छहारी तथा शीतल ठाउँमा बस्न र पानी धेरै पिउन उनको सुझाव छ। ‘तातो हावाबाट हुन सक्ने जोखिमबारे धेरैलाई जानकारी छैन,’ उनले भनिन्, ‘यस्तो बेला बाहिर निस्कनु घातक हुन्छ।’
गर्मी बढेसँगै संक्रामक रोगको जोखिम बढ्ने भएकाले सचेत हुनुपर्ने उनको भनाइ छ। यस्तो बेलामा सकेसम्म घरबाहिर ननिस्कने र सरसफाइमा ध्यान दिनुपर्ने बताउँदै उनले भनिन्, ‘विशेषगरी बालबालिकालाई ध्यान दिनुपर्छ।’ उनीहरूलाई झोलिलो र पोसिलो खानेकुरा दिनुपर्ने उनी बताउँछिन्। गर्मीले पानीका स्रोत सुक्दै जाँदा जनावर तथा चराचुरुंगीलाई पनि समस्या भएको छ। अहिले बाँकेका साना खोला र तालतलैया पानीविहीन छन्। जसले गर्दा गाईवस्तु, जनावर, चराचुरंगीलाई समेत पानी खान समस्या भएको छ। नेपालगन्ज, कोहलपुरलगायतका सहरी क्षेत्र सुनसान भएका छन्। कार्यालयहरूमा पनि सेवाग्राही कम छन्। गर्मीका कारण विद्यालयहरू बन्द गरिएका छन्। नागरिक दैनिकबाट
