काठमाडौं, जेठ ३१ । डेढ दशकको अवधिमा नेपालले स्वास्थ्य उपचार सेवामा फड्को मारेको छ। दुर्लभ र अत्याधुनिक प्रविधिबाट हुनेबाहेक अन्य सबैजसो उपचार मुलुकमा हुन थालेको चिकित्सकहरूको दाबी छ। तर नेताहरूमा भने सामान्यदेखि जटिल समस्याको उपचार गर्न अहिले पनि विदेशै जाने प्रवृत्ति कायमै छ।
पूर्वप्रधानमन्त्री एवं नेपाली कांग्रेसका सभापति शेरबहादुर देउवा र उनकी पत्नी आरजु राणा स्वास्थ्य परीक्षणका लागि मंगलबार सिंगापुरतर्फ लागेका छन्। देउवा दम्पती नियमित स्वास्थ्य परीक्षणका लागि सिंगापुर जाने गरेका छन्। यसपटक पनि नियमित स्वास्थ्य जाँच गराउन सिंगारपुर गएको देउवाका प्रेस सल्लाहकार गोविन्द परियारले बताए। ‘खास के भएको हो थाहा छैन, उहाँ नियमित स्वास्थ्य परीक्षण गराउन सिंगापुर नै जानुहुन्छ,’ उनले भने।
नियमित स्वास्थ्य परीक्षण होस् या सानोरठूलो रोग लागेमा नेताहरू विदेशमा जाने चलन पुरानै हो। तत्कालीन राष्ट्रपति रामवरण यादव र विद्यादेवी भण्डारी, पूर्वप्रधानमन्त्री केपी शर्मा ओली, नेकपा एकीकृत समाजवादीका नेता एवं पूर्वप्रधानमन्त्री झलनाथ खनाल, माओवादी नेता नारायणकाजी श्रेष्ठ, वर्षमान पुनलगायतले भारत, चीन, जापान, थाइल्यान्ड, सिंगापुरलगायत देश पुगेर उपचार गराएका छन्।
डेढ दशकको अवधिमा नेपालले स्वास्थ्य उपचार सेवामा फड्को मारेको छ। दुर्लभ र अत्याधुनिक प्रविधिबाट हुनेबाहेक अन्य सबैजसो उपचार मुलुकमा हुन थालेको चिकित्सकहरूको दाबी छ। तर नेताहरूमा भने सामान्यदेखि जटिल समस्याको उपचार गर्न अहिले पनि विदेशै जाने प्रवृत्ति कायमै छ।
राष्ट्रिय चिकित्सा विज्ञान प्रतिष्ठानमा भिभिआइपी र भिआइपीको उपचार गर्न छुट्टै व्यवस्था छ। पछिल्लो समय सरकारी र निजी दुवै तहका अस्पताल जटिल रोगको पनि उपचार गर्न सक्षम भएको चिकित्सक बताउँछन्।
‘हामीले धेरै रोगको उपचार नेपालमै गर्न सक्छौं भनेका छौ, नेपालमा उपचार हुन नसक्ने अति जटिल रोगका लागि मात्र राज्यको उच्च तहमा रहेका नेताहरूलाई विदेश जान सिफारिस गर्छौं तर कतिपय नेताहरू आफ्नो छनोटका कारण विदेश जान्छन्,’ वीर अस्पतालका निर्देशक डा. सन्तोष पौडेलले भने। उनका अनुसार विदेश गएर उपचार गराउनुपर्ने भएमा मेडिकल बोर्डले सिफारिस गर्छ। नागरिक दैनिकबाट
