![](https://reportersnepal.com/wp-content/uploads/2023/07/1690249840_farmacy-1200x560-1-768x358.jpg)
काठमाडौं, साउन ९ । स्वास्थ्य तथा जनसंख्या मन्त्रालयले सोमवार दश वटा फार्मेसी सिल गरेको छ भने दुइ दर्जन बढी फार्मेसीलाई सचेत गराएको छ । सोमवार स्वास्थ्य तथा जनसंख्या मन्त्रालय, औषधी व्यवस्था बिभाग र स्वास्थ्य सेवा बिभाग सहितको टोलीले अनुगमनको क्रममा उक्त फार्मेसीहरु सिल गरेको हो । टोलीले सोही दिन १ सय १ वटा फार्मेसी अनुगमन गरेको छ । अनुगमनमा स्वास्थ्य तथा जनसंख्या मन्त्री मोेहन बहादुर बस्नेत, औषधी व्यवस्था विभागका महानिर्देशक नारायण ढकालको टोली ललितपुर क्षेत्रका फार्मेसी अनुगमन गरेको थियो ।
अनुगमन टोलीका संयोजकहरुका अनुसार अर्कै फर्मासिस्टको सर्टिपिकेट राखेर फार्मेसी चलाइरहेकोको पाइएको जनाएका छन् । त्यसैगरी विक्रि बितरण गर्ने अनुमती नै नल्याएर लागुऔषधजन्य तथा मानसिक रोगजन्य औषधी फार्मेसीबाट बिक्री बितरण गरेको, म्याद गुज्रिएको र नगुज्रिएको औषधी एकै ठाउँमा राखिएको,
दर्ता नै नभएका र सरसफाईमा ध्यान नदिएको जस्ता साझा समस्या देखिएको छ । अनुगमनमा संलग्न डा. हेमन्त ओझाले आफूहरुले निरिक्षणको क्रममा दर्ता नै नगरि फार्मेसी सञ्चालन गरिरहेको पाएपछि सिल गरेको बताए । गोकर्णेश्वरमा दर्ता नै नगरिएका औषधी पसल फेला परेपछि दुई वटा सिल नै गरिएको अर्का टोलीका संयोजक सागर दाहालले बताए ।
फार्मेसीहरुले फर्मासिस्टको प्रमाणपत्र भाडामा लिएर अर्कै व्यक्तिलाई कर्मचारी बनाएर फार्मेसी चलाईरहेको, औषधि व्यवस्था विभागले तोकेका मापदण्ड पुरा नगरेको र अनुमति नलिएर समेत फार्मेसी चलाइरहेको गुनासो आएपछि मन्त्रीबस्नेतले देश भरि नै फार्मेसीहरुको अनुगमनलाई व्यापकता दिन औषधि व्यवस्था विभागलाई निर्देशन दिएका थिए । नागरिक दैनिकबाट