काठमाडौं, साउन १९ । दोलाखाको गौरीशंकर गाउँपालिका ७ मार्बुमा बिहिबार साँझ गएको पहिरोमा परी ४ जना बेपत्ता भएका छन् । पहिरोमा परी गम्भीर घाईते भएका ३ लाई हेलिकप्टर मार्फत राजधानी लैजाने प्रयास भईरहेको छ।
दोलखाको उत्तरी गौरीशंकर गाउँपालिका ७ मार्बु गाउँको टोपाटार बस्तीमा बिहिबार साँझ करिब ५ बजे छिमेकी वडा खारे तर्फको भिरबाट खसेको पहिरोले बस्ती पुरेको थियो। मार्बुका वडाअध्यक्ष सोनाम शेर्पाका अनुसार पहिरोबाट पहिरोले बस्तीका ५ घर पुरेको छ। पहिरोमा परेर स्थानीय ५४/५५ बर्षका कृष्णबहादुर मगर, सोही उमेर हाराहारीका उनकी श्रीमती देव मगर, ५३/५४ बर्षका हरिलाल श्रेष्ठ र ३ बर्षको बालक प्रिन्स थामी बेपत्ता छन् । सुरक्षाकर्मी र गाउँले मिलेर उनिहरुको खोजी भईरहेको छ ।
पहिरोमा परेर स्थानीय यज्ञ तामी, उनकी श्रीमती धनकुमारी थामी र बुहारी सरिता थामी गम्भीर घाईते छन् । उनिहरुलाई हेलिकप्टर मार्फत राजधानी पठाउने प्रयास भईरहेको छ । हराईरहेका बालक प्रिन्स सरिताको छोरा हुन् ।
