बुटवल, असोज २ । रुपन्देहीको तिलोत्तमामा छुरा प्रहार गरेर एक युवाको हत्या भएको छ । घटनामा ३ जना घाइते भएका छन् । सोमबार साँझ दुई मजदुर समूहबीच विवादपछि भएको झडपमा मकवानपुर हेटौंडाका २४ वर्षीय सुरेश सेन्तानको मृत्यु भएको हो ।
झडपमा काठमाडौं महानगरपालिका–१ का विकास वाईवा, मकवानपुर गढी गाउँपालिका–६ का राजु तामाङ र मकवानपुरकै हस्ता सिंह घाइते भएका छन् । घाइतेहरूलाई उपचारका लागि यूनिभर्सल मेडिकल कलेज भैरहवा पठाइएको बुटवल प्रहरीले जनाएको छ ।
घटनामा संलग्न भएको आरोपमा १३ जनालाई नियन्त्रणमा लिई अनुसन्धान भैरहेको ईलाका प्रहरी कार्यालय बुटवलका प्रहरी नायव उपरीक्षक दानबहादुर थापाले जानकारी दिए ।
