काठमाडौं,१० असोज । काठमाण्डौ उपत्यकाको विभिन्न ७ भन्दा बढी स्थानहरुमा स्कुटरको प्रयोग गरी सुन पसलमा गई सुनका गरगहना किन्ने बहाना बनाई चोरी गरी फरार रहेका ४ जनालाई प्रहरीले पक्राउ गरेको छ ।
प्रहरीले काठमाडौंको गुहेश्वरीबाट काठमाण्डौ तारकेश्वर नपा वडा नं ९ घर भई हाल जिल्ला काठमाण्डौ ढुङगेधारा बस्ने रत्न महर्जन, सुमन पुतुवार, नुवाकोटको बेलकोटगढी नगरपालिका–७ का ३६ वर्षीय वीरेन्द्र विक र भारतको महाराष्ट्र घर भइ काठमाडौंको माछापोखरी बस्ने ३७ वर्षीय हनुमन्त फाँडेलाई पक्राउ गरेको हो ।
जसमध्ये विक र फाँडे चोरीको सुन खरिद गर्ने व्यक्ति भएको प्रहरीले जनाएको छ । पक्राउ परेकाहरुबारे थप अनुसन्धान भईरहेको प्रहरीले जनाएको छ ।
