काठमाडौं, २२ असोज । चेतन मानन्धर हत्या अभियोगमा जेलमा रहँदारहँदै संविधान दिवसको अवसरमा नेपाल सरकार, गृह मन्त्रालयको सिफारिशमा राष्ट्रपति रामचन्द्र पौडेलबाट आममाफी पाएका रिगल भनिने योगराज ढकालले आफूले चेतनको हत्या नगरेको स्पष्ट पारेका छन् । उनले चेतनको हत्या गर्ने व्यक्ति अहिलेपनि जेलमै रहेको दाबी गरे । तर, न्यायालयले आफूलाई दोषी ठहर गरेर जेलमा राखेको उनको भनाई छ । उनले जेलमा रहेका सबै दोषी हुन्छन् भन्ने नरहेको पनि जिकिर गरे ।
हिजो (आइतबार) राति प्राइम टिभीबाट प्रसारण भएको ‘जनता जान्न चाहन्छन्’ कार्यक्रममा पत्रकार ऋषि धमलासँग कुरा गर्दै उनले बताएका हुन् । उनले भने,‘जेल पर्यो भन्दैमा सबै अपराधी छन् भन्ने पनि होईन, अहिलेपनि जेलमा ६० प्रतिशत निर्दोष व्यक्तिहरु छन् । आज सामान्यभन्दा सामान्य केसमा पनि मुद्दा लगाएर जेलमा कोच्ने प्रवृत्ति हाबी भएको छ ।’ उनले आफू कैद कट्टाबाट (८ वर्ष २ महिना) जेल बसेर रिहा भएको भन्दै आममाफी भनिएकोमा आपत्ति जनाए ।
उनले भने,‘मलाई आममाफी दिएकै छैन नि, मैले त ८ वर्ष २ महिना कैद काटेको छु । मैले आममाफी पाएको होईन, विचरा राष्ट्रपतिज्यूलाई त्यत्तिकै दोषी प्रमाणित ?’ ढकालले आफूले कैदबाट जम्मा २ वर्षमात्रै छुट पाएको दाबी गरे ।
उनले भने,‘मेरो आचरण सही भएकोले मैले २ वर्ष कैद छुट पाएको हुँ । उनले आफूले कांग्रेसको नेताको छत्रछायाँ पाएको भन्ने कुरा गलत भएको सुनाए । उनले आफू २०७२ सालमा जेल पर्दापनि कांग्रेसकै तत्कालिन सभापति सुशिल कोइरालाको नेतृत्वमा सरकार रहेको स्मरण गराए । उनले अहिलेसम्म आफूले पार्टी सभापति शेरबहादुर देउवासँग फेस–टु–फेस नभेटेको पनि दाबी गरे ।
उनले आफूले यसअघि राष्ट्रिय स्वतन्त्र पार्टीका सभापति रवि लामिछानेलाई सम्मान गर्ने गरेको स्मरण गराए । तर, आफू रिहा भएपछि गरेको टिप्पणीलाई लिएर भने उनले रवि लामिछानेप्रति आक्रोश पोखे । उनले भने,‘म रवि लामिछानेलाई एकदमै सम्मान गर्थें । अहिले जुन किसिमले उहाँहरुले युवाका नेतृत्व गरेर, उ गरेर भन्नुभएको छ । तर, म रवि सरलाई के भन्न चाहन्छु भने–सर, नीति र नियम पालना गरेर छुटेको मान्छेलाई त्यसै अरुको बहकाउ र उक्साहटमा लागेर नबोलिदिनुहोस ।’
