काठमाडौं, कार्तिक १५ । विश्वकप अन्तर्गत हिजो भएको खेलमा पाकिस्तानले बंगलादेशलाई सात विकेटले पराजित गरेको छ । यो जितपछि पाकिस्तानले ६ अंक जोड्दै अफगानिस्तानलाई उछिनेर पाँचौं स्थानमा उक्लेको छ ।
लगातार चारवटा खेलमा हार व्यहोरेपछि पाकिस्तानको लागि यो जित निस्केको हो । अब पाकिस्तानको सेमिफाइनल यात्राको सम्भावना सहज बनेको छ । बंगलादेश भने २ अंकसहित नवौं स्थानमा रह्यो । यो हारसंगै बंगलादेश प्रतियोगिताबाट बाहिरिएको छ ।
जितका लागि २ सय ५ रन पछ्याएको पाकिस्तानले ३२।३ ओभरमा ३ विकेट गुमाएर विजयी रन बनायो । त्यसमा अब्दुल्लाह सफिकले ६८ र फखर जमानले ८१ रन बनाए ।
त्यस अगाडि पहिले ब्याटिङ गरेको बंगलादेशले ४५।१ ओभरमा सबै विकेट गुमाएर २ सय ४ रन बनाएको थियो ।.
