काठमाडौं, कार्तिक १५ । संयुक्त राष्ट्रसङ्घका महासचिव एन्टोनियो गुटेरेस नेपालको चारदिने औपचारिक भ्रमण सकाएर आज न्युयोर्क फर्किँदै छन्। उनी अहिले बिहान १०ः १५ बजे कतार एयरवेजको उडानमार्फत न्युयोर्क फर्किन लागेका हुन् ।
आइतवार राति काठमाडौं आइपुगेका गुटेरेसले राष्ट्रपति रामचन्द्र पौडेल, प्रधानमन्त्री पुष्पकमल दाहाल, सभामुख देवराज घिमिरे, राजनीतिक दलका नेताहरू, मन्त्रीहरू लगायतसँग छुट्टाछुट्टै भेटवार्ता गरेका थिए।
नेपाल बसाइका क्रममा उनले अन्नपुर्ण आधार शिविर, पोखरा र लुम्बिनीको भ्रमण गरेका थिए। उनी नेपाल आउनुको प्रमुख एजेन्डा जलवायु परिवर्तन र शान्ति प्रक्रियाको विषय थियो। मङ्गलवार संसदमा सम्बोधन गर्ने क्रममा पनि उनले जलवायु परिवर्तन र शान्ति प्रक्रियाको विषयमा जोड दिएका थिए।
