काठमाडौं, कार्तिक १९ । नेपाल विद्युत प्राधिकरणका कर्मचारीहरु आन्दोलित भएका छन्। प्राधिकरणका ट्रेड युनियनहरुले आन्दोलनका कार्यक्रम अन्तर्गत आज कार्यकारी निर्देशक कुलमान घिसिङलाई कार्यालय प्रवेशमा रोक लगाउने भएका छन्।
नेपाल विद्युत प्राधिकरण कर्मचारी युनियन र नेपाल विद्युत प्राधिकरण कर्मचारी संघ ९आधिकारिक ट्रेड युनियन०ले आज देखि ३ दिन कार्यकारी निर्देशक कुलमान घिसिङसहित उच्च तहका कर्मचारीलाई कार्यालय प्रवेशमा रोक लगाउने तयारी गरेका हुन्।
उनीहरुले आज कात्तिक १९ गते बिहान ११:१५ बजेदेखि १२:१५ बजेसम्म कार्यकारी निर्देशक, उपकार्यकारी निर्देशक प्रशासन, जनसाधन विभागका निर्देशक र सम्पूर्ण प्रादेशिक कार्यालयका प्रमुखलाई कार्यकक्षमा प्रवेश निषेध गर्ने बताएका छन् । त्यस्तै २० गते बिहान ११:१५ बजेदेखि १२:४५ बजेसम्म कार्यकारी निर्देशक, उपकार्यकारी निर्देशक प्रशासन, जनसाधन विभागका निर्देशक र सम्पूर्ण प्रादेशिक कार्यालयका प्रमुखलाई कार्यकक्षमा प्रवेश निषेध गर्ने उल्लेख गरेका छन् ।
२१ गते बिहान ११:१५ बजेदेखि ०१:१५ बजेसम्म कार्यकारी निर्देशक, उपकार्यकारी निर्देशक प्रशासन, जनसाधन विभागका निर्देशक र सम्पूर्ण प्रादेशिक कार्यालयका प्रमुखलाई कार्यकक्षमा प्रवेश निषेध गर्ने आन्दोलनको कार्यक्रममा उल्लेख छ।
यस्ता छन् ७ बुँदे माग
१) विद्युत विधेयक २०८० खारेजी गर्नु पर्ने ।
२) EPR मा २१ दिने हाजिरको मापदण्ड वैज्ञानिक बनाउने ।
३) संचालक समितिबाट निर्णय भएको ५२ महिना सावधिक जीवन विमा तत्काल लागू गर्ने ।
(४) ज्यालादारी कर्मचारीहरूलाई तोकिएको समयावधि भित्र मासिक ज्यालादारी गर्ने ।
(५) कर्मचारी सेवा, शर्त विनियम २०७५ संशोधन (सरुवा, बढुवा, विज्ञापन, O&M) सम्बन्धमा।
६) २० वर्षे सेवा अवधि नपुगि अनिवार्य अवकाश हुँदा प्राप्त हुने विमा सम्बन्धमा।
(७) कर्मचारी सापटी र औषधोपचार विमा सम्बन्धमा ।
यस ३ दिनको अवधिसम्म पनि मागहरू पूरा नभएमा मिति २०८०/०७/२२ गते कडा भन्दा कडा थप आन्दोलनका कार्यक्रमहरू दिन बाध्य हुने ट्रेड युनियनहरुले जनाएका छन् ।
