काठमाडौं,१९ कार्तिक । आईसीसी टी-२० विश्वकप छनोटको एसिया छनोटको फाइनलमा नेपाल ओमानसँग पराजित भएको छ । निर्धारित २०-२० ओभरमा स्कोर बराबरी भएपछि सुपरओभरबाट निर्णय भएको हो ।
सुपर ओभरमा ओमानले २२ रनको लक्ष्य दिएकामा नेपालले जम्मा १० रन मात्र बनाउन सक्यो ।
त्रिवि किकेट मैदानमा नेपालले दिएको १८५ रनको लक्ष्य पछ्याएको ओमानले निर्धारित २० ओभरमा ९ विकेट गुमाएर १८४ रननै बनाएपछि खेल बराबरीमा पुगेको थियो ।
दुई टोलीबीच खेल बराबरी भएपछि सुपर अोभरबाट निर्णय लिईएको थियो । जसमा पहिला ब्याटिङ गरेको ओमानले २१ रन जोड्दै नेपाललाई २२ रनको लक्ष्य दिएको थियो । जवाफमा नेपालले केवल १० रनमात्रै जोड्न सक्यो । ओमानसँग हारेसँगै नेपाल उपाधि घरमै राख्नबाट चुकेको छ ।
यसअघि त्रिवि क्रिकेट मैदानमा टस जितेर पहिला ब्याटिङ गरेको नेपालले निर्धारित २० ओभरमा ६ विकेट गुमाएर १८४ रनको योगफल खडा गरेको थियो ।
नेपालले सुरुवातका २ ओभरमा उत्कृष्ट प्रदर्शन गरेपनि त्यसपछि लगातार विकेट गुमाएको थियो । पहिलो विकेटको रुपमा आसिफ शेखलाई ६ रनमा गुमाएको थियो भने दोस्रो विकेटको रुपमा नेपालले सन्दीप जोरालाई गुमाएको थियो । पहिलो पटक वान डाउनमा ब्याटिङ गरेका सन्दिप जोरा १० रनमा आउट भएका थिए ।
त्यस्तै तेस्रो विकेटको रुपमा नेपालले ओपनर कुशल भूर्तेललाई ३१ रनमा गुमाउँदा नेपालको अवस्था नाजुक थियो । लगातार विकेट गुमाएको अवस्थामा पाँचौ विकेटको रुपमा मैदान प्रवेश गरेको गुल्सन झाले उत्कृष्ट प्रदर्शन गरेपछि नेपालको अवस्था उल्टिएको थियो । उनले २० बलमा ५० रन पूरा गरेर अर्धशतक बनाएका थिए । उनले ४ छक्का र ५ चौका हिर्काएका थिए । उनी ५४ रन बनाएर बिलाल खानको बलमा आउट भएका थिए ।
टी २० आईमा पहिलो अर्धशतक बनाएका गुल्सन ५४ रनमा आउट भएका छन् । उनले कप्तान रोहित पौडेलसँग ७८ रनको साझेदारी गरेका थिए ।
भने नेपालका लागि कप्तान रोहित पौडेलले अर्धशतक प्रहार गर्दै ५२ रन बनाउँदा ६ बलको सामना गरेका करण केसीले २० रन जोडे । करणले अन्तिम ओभरमा १ चौका र २ छक्का प्रहार गरेका थिए ।
बलिङतर्फ ओमानका बिलाल खानले तीन तथा अकिब इलियासले दुई विकेट लिए ।
