काठमाडौँ,२१ कार्तिक। प्रधानमन्त्री पुष्पकमल दाहाल ‘प्रचण्ड’ले बोलाएको सर्वदलीय बैठक सुरु भएको छ ।
प्रधानमन्त्री पुष्पकमल दाहालले आज गत शुक्रबार जाजरकोटमा गएको भूकम्पको बारेमा छलफल गर्न सर्वदलीय बैठक आव्हान गरेका थिए ।
बैठक प्रधानमन्त्री तथा मन्त्रिपरिषद्को कार्यालय सिंहदरबारमा केहीबेर अघि सुरु भएको हो । बैठकमा राष्ट्रिय मान्यता प्राप्त राजनीतिक दलका शीर्ष नेता सहभागी छन् ।
बैठकमा नेपाली कांग्रेसका सभापति शेरबहादुर देउवा, नेता कृष्ण सिटौला, नेकपा एमालेबाट वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शंकर पोखरेल, महेश बर्तौला, पदम गिरी, नेकपा माओवादी केन्द्रबाट पम्फा भुसाल, नेपाल समाजवादी पार्टीका अध्यक्ष डा. बाबुराम भट्टराईलगायतका नेताहरुको उपस्थिति रहेको छ ।
शुक्रबार राती जाजरकोटको रामिडाँडा केन्द्र भएर ६।४ रेक्टर स्केलको भूकम्प गएको थियो । उक्त भूकमपबाट हालसम्म १५३ जनाले ज्यान गुमाएका छन् । भने सयौं घाईते भएका छन् ।
